თბილისის სატრანსპორტო კომპანიის დამოუკიდებელი პროფესიული კავშირის, ერთობა 2013-ის ინფორმაციით, მეტროს მემანქანეების და სხვა პოზიციებზე დასაქმებული თანამშრომლების დიდი ნაწილი ინფიცირებულია. პროფკავშირში ინფიცირების ჯაჭვის გასაწყვეტად მკაცრ შეზღუდვებს ითხოვენ.
მათ ამ განცხადებას თბილისის სატრანსპორტო კომპანია „პრაიმტაიმთან“ ეხმაურება.
„განცხადებაში რაც არის მითითებული, რომ მათ მიერ შემოთავაზებული იყო მეტროს სამუშაო საათების შემცირება და ინტერვალის გაზრდა, ეს ამ პანდემიის პირობებში ტვირთად დააწვებოდა ჩვენს მგზავრებს და მნიშვნელოვანია, რომ პანდემიის პირობებში, ჩვენ მაქსიმალურად უზრუნველვყოთ მგზავრებისთვის უსაფრთხო და შეუფერხებელი გადაადგილება, რადგან მოსახლეობის ძირითადი ნაწილი გადაადგილების საშუალებად იყენებს თბილისის მეტროს და შესაბამისად მათი წინადადება, რომ გაზრდილიყო ინტერვალი და შემცირებულიყო მეტროს სამუშაო საათები, გამოიწვევდა დატვირთვის გაზრდას და მეტი მგზავრის თავმოყრას, განსაკუთრებით პიკის საათებში. შესაბამისად ეს წინადადება ისევ მგზავრთა უსაფრთხოებიდან გამომდინარე ვერ იქნებოდა მისაღები.
რაც შეეხება უსაფრთხოების წესებს, თბილისის სატრანსპორტო კომპანია მაქსიმალურად აკეთებს ყველაფერს, ხდება ყოველდღიური დეზინფექცია.
ასევე კომპანისა ჰყავს კონტრაქტორი კომპანიები, რომლებიც უზრუნველყოფენ სიმპტომის გაჩენის შემთხვევაში თანაშრომლების სწრაფი ტესტებით მომსახურეობას.
სატრანსპორტოს სულ ემსახურება 250 მემანქანე, დღეის მდგომარეობით კი 20-მდე მემანქანეა ინფიცირებული.
ჩვენი მემანქანეების რაოდენობა გვაძლევს საშუალებას, რომ მეტრომ არ გამოიწვიოს რაიმე სახის შეფერხება, გვაქვს საშუალება მეტრომ იმუშაოს სრული დატვირთვით.
მეტროს დახურვის გადაწყვეტილებას, თბილისის სატრანსპორტო კომპანია ვერ მიიღებს, ეს საკოორდინაციო საბჭოს გადასაწყვეტია“, – გვითხრეს თბილისის სატრანსპორტო კომპანიაში.
მეტროს მემანქანეების დიდი ნაწილი კორონავირუსით ინფიცირებულია – პროფკავშირი
