დღეს მნიშვნელოვანი დღეა. თბილისელებს და დამსწრე საზოგადოებას, უნდა წარუდგინოთ და ვაჩვენოთ, თუ როგორი იქნება თბილისის ცენტრალური პარკი. საზოგადოებამ ძალიან კარგად იცის, რომ ბოლო წლების განმავლობაში, განსაკუთრებული ყურადღება ექცევა რეკრეაციული სივრცეების არსებობას ქალაქში. პარკების განახლებას, რეაბილიტაციას, სკვერების კეთილმოწყობას, – ამის შესახებ თბილისის მერმა კახა კალაძემ თბილისის ცენტრალური პარკის პრეზენტაციაზე განაცხდა.

მისი თქმით, ბოლო წლების განმავლობაში იყო ცუდი ტენდენცია. „რეკრეაციული სივრცეების ხარჯზე, სკვერების ადგილზე, სპორტული მოედნების ხარჯზე ხდებოდა ქალაქის განვითარება და მშენებლობები. რაც კატეგორიულად მიუღებელი და დაუშვებელია. ჩვენ როდესაც მოვედით ქალაქის მთავრობაში, პირველი დღიდანვე დავიწყეთ ამ მიმართულებით მუშაობა“, – აღნიშნა კახა კალაძემ.

ნახეთ: ასეთი იქნება ახალი იპოდრომი, რომელიც ბიძინა ივანიშვილმა თბილისს უსასყიდლოდ გადასცა – ფოტო

კახა კალაძის განცხადებით, თბილისის ცენტრალური პარკი ყოფილი იპოდრომის ტერიტორიაზე, 36 ჰექტარზე განთავსდება.

„წარმოდგენილი პროექტის თანახმად, ეს იქნება მულტიფუნქციური სივრცე, სადაც გათვალისწინებულია ბოტანიკური ბაღი, იაპონური ბაღი, ფრანგული ბაღი, ამფითეატრი, შადრევანი, სკეიტ პარკი, სასაზღვრო სატყეო ზონა, შიდა სატყეო სექტორი, საგანმანათლებლო ცენტრი, მდელო, ზიპლაინი, სპორტის და კვების ზონა. ასევე, მოეწყობა ცხოველების სასეირნო სივრცე, პანორამული პლატფორმა, თოკების პარკი, საფეხმავლო ხიდი, სამთო ველოსიპედების ბილიკები, სტრიტბოლის სივრცე, არეალები ლაშქრობისა და კლდეზე ცოცვისთვის, ხოლო პარკის გარშემო იფუნქციონირებს სამი ავტოსადგომი. პარკში განთავსდება ცხენოსნის ქანდაკება, როგორც ამ ტერიტორიის სიმბოლო“, – აღნიშნა კალაძემ.

ყოფილი იპოდრომის ტერიტორიაზე მალე ცენტრალური პარკი გაშენდება. საერთაშორისო საქველმოქმედო ფონდმა „ქართუმ“ თბილისის მუნიციპალიტეტს საკუთრებაში უსასყიდლოდ გადასცა ყოფილი იპოდრომის ტერიტორია, რომელიც კერძო მესაკუთრეებისგან გამოისყიდა.