დაახლოებით ერთი საათის წინ ბახტრიონის ქუჩაზე მიმავალ ავტობუსს ელექტრო სადენი დაეცა. შემთხვევის შედეგად დაზიანდა და მთლიანად დაიმსხვრა მუნიციპალური ტრანსპორტის სახურავზე დამონტაჟებული საქარე მინა ე.წ. „ლუქი“. შემთხვევის დროს 42 ნომერ ავტობუსში ათამდე მგზავრი იჯდა.
როგორც „პრაიმტაიმს“ ერთ-ერთმა მგზავრმა განუცხადა, შემთხვევის შედეგად მგზავრები არ დაშავებულან.
„42 ნომერ ავტობუსში დაახლოებით ათი მგზავრი ვიყავით. ბახტრიონის ქუჩაზე რომ შემოვუხვიეთ, დაახლოებით 50 მეტრიც არ გვქონდა გავლილი, რომ მოულოდნელად ჩაიმსხვრა სახურავზე დამონტაჟებული „ლუქი“.
შუშა ნამსხვრევებად დაიშალა და ზედ დაგვეცა მგზავრებს. საბედნიეროდ არავინ დაშავებულა. თავიდან ვერ მივხვდით რა მოხდა. მძღოლმა მაშინვე გააჩერა ავტობუსი და გარეთ რომ გადმოვედით ვნახეთ, რომ გაწყვეტილი ელექტრო სადენი ეგდო გზაზე.
შეიძლებოდა საშინელება დატრიალებულიყო და დენი ავტობუსზე გადაეტანა. ღმერთის წყალობით გადავრჩით.“ – აცხადებს ერთ-ერთი მგზავრი.
თბილისის სატრანსპორტო კომპანიაში აცხადებენ, რომ მომხდარზე მიმდინარეობს გამოძიება და გამომწვევი მიზეზი, მისი დასრულების შემდეგ გახდება ცნობილი.
