საპარლამენტო არჩევნებთან ერთად, აჭარაში უმაღლეს საბჭოს აირჩევენ. არის თუ არა უკვე გარკვეული, ვინ იქნება საარჩევნო სიაში „ქართული ოცნებიდან“? ამ კითხვას აჭარის საზოგადოებრივი მაუწყებლის ეთერში, ვახო ხუზმიაშვილის საავტორო გადაცემა „თავისუფალ სივრცეში“ სტუმრად მყოფმა, აჭარის მთავრობის თავჯდომარე თორნიკე რიჟვაძემ ასე უპასუხა:

„მესმის თქვენი ინტერესი, მაგრამ ამ დროისთვის სია არ არსებობს, თუმცა მინდა გითხრათ, რომ სიაში იქნებიან გამოცდილი, ძველი და დაუზიანებული პოლიტიკოსები. დაზიანებული პოლიტიკოსები არ გვყავს, თუმცა გუნდში გვეყოლება ახალი სახეები.“- განაცხადა თორნიკე რიჟვაძემ.

კითხვას, იმ შემთხვევაში თუ უმრავლესობამ მოიგო არჩევნები, არსებული შემადგენლობიდან რამდენი პროცენტი დარჩება უმაღლეს საბჭოში, რიჟვაძე პასუხობს:

„არჩევნებს აუცილებლად მოვიგებთ, რაც შეეხება პროცენტულობას, ამას ქართველი ხალხი გადაწყვეტს. ნუ გავუსწრებთ მოვლენებს წინ.

ძალიან მალე, როგორც კი საკონსტიტუციო ცვლილებებს დავასრულებთ, შემდეგ აჭარაშიც მოგვიწევს იმ ხაზის გატარება, რომელიც მიზნად ისახავს შერეული სისტემის კიდევ უფრო მეტად პროპორციულ სისტემაზე გადასვლას.

როგორც მაჟორიტარების ნაწილში, ისევე საარჩევნო სისტემის კუთხითაც, თქვენ, ასევე თქვენი კოლეგები და საზოგადოება აუცილებლად გაიგებთ.“ – განაცხადა თორნიკე რიჟვაძემ.

იქნება თუ არა თორნიკე რიჟვაძე, უმაღლესი საბჭოს სიაში პირველი ნომერი, აჭარის მთავრობის თავჯდომარემ ამაზე არ ისაუბრა. მისი თქმით, ის იქნება „ქართული ოცნების“ გუნდში.