„სხვადასხვა საკითხზე აზრთა სხვადასხვაობა არსებობს. რაც შეეხება ამნისტიის შესახებ კანონპროექტს, იცით, ჩვენ ჩვენი კანონპროექტი მზად გვაქვს. ამიტომ, თუ საბოლოო ჯამში, საერთო კანონპროექტზე ვერ შევთანხმდით, ცხადია, პარლამენტში კანონპროექტის ორი სხვადასხვა ვერსია იქნება დარეგისტრირებული. მე იმედს ვიტოვებ, რომ შეიძლება პოზიციების დაახლოება”, – ამის შესახეებ „ნაციონალური მოძრაობის“ წევრმა სალომე სამადაშვილმა ევროკავშირის ოფისში გამართული შეხვედრის დასრულების შემდეგ, ჟურნალისტებს განუცხადა.

„ჩვენ მივაღწიეთ ძალიან კონკრეტულ შეთანხმებას, პირობას, რომ ამნისტია შეეხებათ იმ კონკრეტულ პირებს, რომელთა წინააღმდეგაც უკვე საქმეებია აღძრული. ასეთი არის კონკრეტულ პირთა წრე, კერძოდ, 16 დემონსტრანტი და 3 პოლიციელი, რომლებზეც საქმეები კონკრეტული მუხლითაა აღძრული. ჩვენ მიგვაჩნია, რომ ამნისტია მხოლოდ და მხოლოდ ამ ადამიანებს უნდა შეეხოთ“, – განაცხადა სამადაშვილმა.