თურქეთში ლოქდაუნი გაუქმდა. ინფორმაციას ამის შესახებ ადგილობრივი მედია ავრცელებს.

მთავრობის განცხადებით, შეზღუდვებმა შედეგი გამოიღო და ქვეყანაში ეპიდემიოლოგიური სიტუაცია გამოსწორდა. სრული ლოქდაუნი თურქეთში 17 დღის განმავლობაში მოქმედებდა.

სწორედ ამიტომ დღეიდან თურქეთში შეზღუდვების ეტაპობრივი მოხსნის 15-დღიანი პერიოდი დაიწყო, რომელიც პირველ ივნისს დასრულდება.

აღნიშნულ პერიოდში კომენტანტის საათი სამუშაო დღეებში საღამოს 9 საათიდან დილის 5 საათამდე იმოქმედებს. შაბათ-კვირას კი ქვეყანა სრულად ჩაიკეტება. კომენდანტის საათის დროს საქალაქთაშორისო მიმოსვლა ნებადართული იქნება.

სავაჭრო ცენტრებს სამუშაო დღეებში საქმიანობა დილის 10:00 საათიდან საღამოს 20:00 საათამდე შეეძლებათ, შაბათ-კვირას კი დაიკეტება. საქორწილო დარბაზები, სპორტული ცენტრები და სათამაშო დარბაზები დაკეტილი დარჩება.

შეგახსნებთ, რომ პანდემიის დაწყებიდან დღემდე თურქეთში კორონავირუსით 44,760 ადამიანი გარდაიცვალა. ინფიცირებულთა რაოდენობა 5 მილიონზე მეტია.

თურქეთში კორონავირუსის ვაქცინის პირველი დოზა 14,96 მილიონმა ადამიანმა უკვე მიიღო. ორივე დოზა კი 10,3 მილიონმა.