ყველაზე მეტად იმ ადამიანების მიკვირს, რომლებიც შეთანხმების შინაარსს ეთანხმებოდნენ, ხელმოწერაზე მოგვიწოდებდნენ და ახლა ამბობენ, რომ თურმე რამე უნდა შევცვალოთ, – ამის შესახებ „სტრატეგია აღმაშენებლის“ ლიდერმა გიორგი ვაშაძემ „პალიტრანიუსის“ ეთერში განაცხადა.
მისივე განმარტებით, „თვალების დათხრა არის არაადამიანური მოპყრობის მუხლი, ამ მუხლს იცავს კონვენცია და ამაზე ამნისტიის კანონი ვერ გავრცელდება“.
„პირველი – ძალიან ვწუხვარ, რომ ძალიან ბევრმა ე.წ. იურისტმა დაიწყო მანიპულაცია ამ შეთანხმების შინაარსით, როცა გუშინ ჩემს გამოსვლაში ძალიან კონკრეტულად ვთქვი და ახლაც ვამბობ, ივანიშვილზე, გახარიაზე, თალაკვაძეზე თუ სხვაზე, რა მნიშვნელობა აქვს, გადაწყვეტილების მიმღებზე ეს ამნისტია არ ვრცელდება და ვერ გავრცელდება. იმიტომ, რომ სამომავლო დანაშაულზე ვერ გავრცელდება ეს აქტი, რომელზეც ჩვენ შევთანხმდით.
მეორე – თვალების დათხრასთან დაკავშირებით იყო საკითხი. პირდაპირ სრული პასუხისმგებლობით ვამბობ, თვალების დათხრა ეს არის არაადამიანური მოპყრობის მუხლი, ამ მუხლს იცავს კონვენცია და ამაზე ამნისტიის კანონი ვერ გავრცელდება. ეს კარგად იციან იურისტებმა, მაგრამ ყველა იქედან აბამს ყურს, როგორც თვითონ უნდათ და ყველას ვთხოვ კარგად წაიკითხონ ეს ყველაფერი.
მესამე – სანამ ვინმე დასკვნებს გააკეთებს, ჯერ ვნახოთ ეს კანონპროექტი და შემდეგ გავაკეთოთ ეს დასკვნები, მაგრამ ყველაზე მეტად იმ ადამიანების მიკვირს, ვინც შეთანხმების შინაარსს ეთანხმებოდნენ და ხელმოწერაზე მოგვიწოდებდნენ და ახლა ამბობენ, რომ თურმე რამე უნდა შევცვალოთ ამ შეთანხმებაში. მათ შორის ვსაუბრობ “ახალგაზრდა იურისტა ასოციაციაზე”. როგორც ჩანს, მის ხელმძღვანელს ცოტა გამოცდილება აკლია, როგორ უნდა მართოს საკუთარი ორგანიზაცია, იმიტომ, რომ ძალიან მაღალი რეპუტაციის მქონეა ეს ორგანიზაცია. ერთ დღეს, რომ ერთს ამბობ და მეორე დღეს – მეორეს, ელემენტარულად ნდობის ფაქტორის დარტყმაა თვითონ ორგანიზაციისთვის“ , – განაცხადა ვაშაძემ.
