“ცესკო-ს თავმჯდომარეობის კანდიდატები უსიტყვო შემსრულებლები იქნებიან იმ უმრავლესობის, რომელიც დღეს ცესკო-შია, პროცესში მონაწილეობის აზრს ვერ ვხედავთ, – ამის შესახებ ჟურნალისტებთან „ნაციონალური მოძრაობის” დეპუტატმა ლევან ბეჟაშვილმა განაცხადა.
ის პარლამენტში ცესკო-ს თავმჯდომარისა და ორ ე.წ. პროფესიონალი წევრის ვაკანტურ თანამდებობაზე წარდგენილი კანდიდატების მოსმენის პროცესის დაწყებას გამოეხმაურა.
„ქართული ოცნება” აგრძელებს შარლ მიშელის დოკუმენტის დარღვევას, რომელიც ეხება საარჩევნო ადმინისტრაციის რეფორმას და ნაცვლად იმისა, რომ ცესკო-ს თავმჯდომარედ ვიხილავდეთ ისეთ კანდიდატურას, რომელიც იქნებოდა მაკონსოლიდირებელი პოლიტიკური სპექტრის და საზოგადოების, არასამთავრობო ორგანიზაციების, ჩვენ კვლავ წარმოგვიდგინეს ორი კანდიდატი, რომელიც არის ცესკო- დან წარმოდგენილი, უსიტყვო შემსრულებელი იქნება იმ უმრავლესობის, რომელიც დღეს ცესკო-შია. ამიტომ, იმ პროცესში მონაწილეობის აზრს ვერ ვხედავთ და განხილვებში მონაწილეობას არ მივიღებთ“, – განაცხადა ბეჟაშვილმა.
შეგახსენებთ, იურიდიულ საკითხთა კომიტეტის სხდომაზე ცესკოს თავმჯდომარეობისა და წევრობის კანდიდატებს დღეს მოუსმენენ.
