“ალბათ, არ დააკვირდა მთლიანად ამ პროცესში რომ ქალბატონმა თამარ ჟვანიამ უპირველეს ყოვლისა გამოიჩინა დიდი სიმხნევე, მიუხედავად იმისა, რომ ნოემბრის დღეებში ის იყო ზეწოლის და ძალადობის ენის სამიზნე, მან ბოლომდე მიიყვანა საარჩევნო ციკლი”, – ამის შესახებ საპარლამენტო უმრავლესობის წევრმა, შალვა პაპუაშვილმა პარტია „საქართველოსთვის“ ლიდერის, გიორგი გახარიას განცხადების საპასუხოდ ჟურნალისტებთან განაცხადა.
„ალბათ, არ დააკვირდა მთლიანად ამ პროცესში რომ ქალბატონმა თამარ ჟვანიამ უპირველეს ყოვლისა გამოიჩინა დიდი სიმხნევე, მიუხედავად იმისა, რომ ნოემბრის დღეებში ის იყო ზეწოლის და ძალადობის ენის სამიზნე, მან ბოლომდე მიიყვანა საარჩევნო ციკლი. დადასტურდა, რომ ამ არჩევნებს არანაირი სისტემური ხარვეზი არ ჰქონია და რაიმე მანიპულაცია არ ყოფილა.
მან ასევე საგამოძიებო კომისიასაც მისცა ახსნა-განმარტებები და საბოლოო ჯამში ჩვენ ვრწმუნდებით, რომ მთლიანი კამპანია გაყალბებულ არჩევნებთან დაკავშირებით თავად იყო ყალბი. ვფიქრობ, თამარ ჟვანიამ თავისი ვალი ბოლომდე მოიხადა იმ კუთხით, რომ 2020 წლის არჩევნებთან დაკავშირებით არ დარჩენილიყო რაიმე პასუხგაუცემელი კითხვა. როგორც ჩანს, მან გადაწყვიტა, რომ ახლა უმჯობესი იქნებოდა პროფესიული განვითარების სხვა ეტაპზე გადასულიყო. დარწმუნებული ვარ, ასეთი გამოცდილი პროფესიონალი შეძლებს იგივე საარჩევნო სფეროში საინტერესო კარიერის წარმართვას“, – განაცხადა შალვა პაპუაშვილმა.
პარტია „საქართველოსთვის“ თავჯდომარემ, გიორგი გახარიამ საკითხის კომენტირებისას განაცხადა: „როგორც ვერ დაიცვა „ქართულმა ოცნებამ“ თავისი უსუსურობით ლეგიტიმური არჩევნების შედეგები, ზუსტად ასე ვერ დაიცვა საარჩევნო კომისიის თავმჯდომარე და დარწმუნებული ვარ, რომ თვითონ შეუწყო ხელი მის გადადგომას“.
