უკრაინის იუსტიციის სამინისტრომ მიიღო გადაწყვეტილება საქართველოს გადასცეს სამხედრო პოლიციის ყოფილი მაღალჩინოსანი, წამებისა და არაადამიანური მოპყრობის რამდენიმე ეპიზოდში ბრალდებული მეგის ქარდავა.
შესაბამისი გადაწყვეტილება ქარდავას უკვე ჩაბარდა. ფაქტს “თავისუფლების ინსტიტუტის” ყოფილი წარმომადგენელი თეა თუთბერიძე სოციალურ ქსელში ეხმიანება და წერს, რომ საქართველოს ხელისუფლება ვოლოდიმირ ზელენსკის გაურიგდა.
“გაურიგდნენ ზელენსკის და შესთავაზეს, რომ გაუშვებდნენ ე.წ. მიშას საქმეზე დაკავებულ უკრაინელ მეზღვაურებს თუ უკრაინა მათ გადმოსცემდა მეგის ქარდავას. ეს პროცესი უკვე დაახლოებით ოთხ თვეზე მეტია მიმდინარეობს პარალელურ რეჟიმში. გამოუშვეს თუ არა ეს უკრაინელი მეზღვაურები სამ დღეში ქარდავას იუსტიციის სამინისტრო უგზავნის გადაწყვეტილებას ექსტრადირებაზე.
როგორც ჩანს უკრაინაში სამართლებრივი მდგომარეობის, ადამიანის უფლებების და კანონის უზენაესობის მხრივ მდგომარეობა იმაზე რთულია ვიდრე ვფიქრობდი. უკრაინა ფეხებზე იკიდებს იმ ფაქტს, რომ მეგის ქარდავას მიმართული აქვს თავშესაფრის მოთხოვნით უკრაინის სახელმწიფოსთვის.
საემიგრაციო სამსახურმა, იმის გამო რომ ზელენსკისა და ღარიბაშვილს შორის გარიგებაა შემდგარი, არ გაუგრძელა ლეგალურად ცხოვრების უფლება ქარდავას სამი თვის წინ. საემიგრაციოს ამ გადაწყვეტილების გასაჩივრება მოხდა სასამართლოში. სასამართლოს საქმის განხილვა ჯერ არც დაუწყია და არც უარი არ არის მიღებული თავშესაფრის მოთხოვნაზე ისე მიიღო იუსტიციის სამინისტრომ გადაწყვეტილება ქარდავას ექსტადირებაზე.
ქარდავას ადვოკატი დარწმუნებული იყო რომ სასამართლო იუსტიციის სამინისტროს ამ უკანონო გადაწყვეტილებას ექსტრადიციაზე გააუქმებდა, რაც ბუნებრივია არ მოხდა, რადგან პოლიტიკური გარიგებაა შემდგარი! ადვოკატმა სასამართლოს უკანონო გადაწყვეტილება გაასაჩივრა ზემდგომ ინსტანციაში.
პროცესი ჩანიშნული იყო 26 აგვისტოს მაგრამ გადაიდო ქარდავას ჯანმრთელობის მდგომარეობის გამო 13 სექტემბერს, რადგან ქარდავას საავადმყოფოში მოუწია დაწოლა.
უკრაინის პოლიცია და პროკურატურა ამის გამო ჩავარდა ისტერიკაში, ისინი სახლში მიუვარდნენ ქარდავას და როცა აღმოაჩინეს რომ ის ნამდვილად საავადმყოფოში იწვა, მივარდნენ საავადმყოფოში, შეუვარდნენ პალატაში, ატეხეს მთელი ამბები და ექიმი საბოლოოდ გახადეს იძულებული შეეწყვიტა მკურნალობა და ქარდავა გაეწერა საავადმყოფოდან.
სანამ საავადმყოფო გაწერდა ქარდავას, ის დღეები საავადმყოფოსთან იყო მობილიზებული პოლიცია. გამოწერეს თუ არა და აიყვანეს ისე რომ 13 სექტემბერს ჩანიშნულ სასამართლო პროცესს არ დაელოდნენ”, – წერს თეა თუთბერიძე.
