ყველას მივმართავ, იქნებ როგორმე ხელისუფლების ანკესზე არ წამოვეგოთ, როგორმე გავიჭირვოთ ორი-სამი კვირა და ამ თემას მივხედოთ ახალი ხელისუფლების პირობებში, – ამის შესახებ „ლელოს“ ერთ-ერთმა ლიდერმა, დავით უსუფაშვილმა დავით გარეჯის საქმეზე საუბრისას განაცხადა.
მისივე თქმით, გარეჯის თემა „შემოგდებულია“, რომ პოლიტიკოსებმაც, მედიამაც და მოსახლეობაც არჩევნებამდე დროის, ყურადღების და ენერგიის დიდი ნაწილი ამ თემაზე დახარჯოს და ხელისუფლებამ ის პრობლემები მიჩქმალოს, რაც ქვეყანაში დგას.
„ნაკლებად უნდა ავყვეთ ხელისუფლებას ამ თამაშებში. დავუთმოთ სათანადო ადგილი, მაგრამ ჩემი თხოვნა და სურვილია, ამ საკითხით არ შევავსოთ მთელი ყურადღება და ეთერი, რადგან ეს არის ხელისუფლების ნომერ პირველი ჩანაფიქრი. თემა ნომერი ორი ეს არის ჩემი და ბევრი ქართველის ღრმა და გულწრფელი წუხილი, იმაზე რომ ხელისუფლების მიერ, ბოლო დროს გადადგმული პიარნაბიჯები არ გვაახლოებს აზერბაიჯანთან საქართველოს ინტერესების შესაბამისი შეთანხმების მისაღწევად. ამიტომ, ყველას მივმართავ, მათ შორის პატიმრობაში მყოფ ადამიანებს, მათ ახლობლებს და საქართველოს მოსახლეობას, იქნებ როგორმე, ხელისუფლების ანკესზე არ წამოვეგოთ, როგორმე გავიჭირვოთ ორი, სამი კვირა და ამ თემას მივხედოთ ახალი ხელისუფლების პირობებში. ეს ძალიან მნიშვნელოვანი საკითხია და თუ გარეჯის საქართველოს სასარგებლოდ გადაწყვეტას სჭირდება გარკვეული მსხვერპლის გაღება, ვიღაცის ციხეში ყოფნა, ვიღაცის ნერვიულობა, მოდი ეს მსხვერპლი გავიღოთ, ოღონდ ორი, სამი კვირით“, – განაცხადა უსუფაშვილმა.
