საქართველოს პრემიერ-მინისტრის, გიორგი გახარიას განცხადებით, აღდგება პროგრამა, რომლის მეშვეობით ემიგრანტები საქართველოში ჩარტერული რეისით დაბრუნდებიან და ამას რამდენიმე კომპანია განახორციელებს. ამის შესახებ მ,ან მთავრობის სხდომაზე განაცხადა.
„ბევრი ინფორმაცია შემოგვდის ჩვენი მოქალაქეების, ქართველი ემიგრანტების მდგომარეობაზე, რომელებიც სხვადასხვა ქალაქში იმყოფებიან.
ეს პროცესი დიდხანს რომ არ გაგვეწელოს და დროში გადავადდეს, მივიღეთ გადაწყვეტილება, რომ აღვადგინოთ პროგრამა, რომელიც ევროპის სხვადასხვა ქალაქიდან ჩვენი თანამემამულეები გამოგვყავდა.
ეკონომიკის სამინისტროს უკვე აქვს მიღებული დავალება, რომ ორშაბათისთვის უნდა არსებობდეს კონკრეტული განრიგი ჩვენი მოქალაქეებისთვის და უნდა იყოს ბილეთებზე მისაღები ფასები. ეს არ უნდა იყოს 200 ევროზე მეტი და კატასტროფული ფასები, რომლებზეც ყველას გვსმენია.
ეკონომიკის სამინისტრომ უნდა იცოდეს, რომ ეს არ უნდა განახორციელოს ერთმა ავიაკომპანიამ, უნდა იყოს რამდენიმე, პირველ რიგში, ჩვენს მოქალაქეებზე მორგებული უნდა იყოს ემიგრანტებზე, რომლებიც სასწრაფოდ გვყავს სხვადასხვა ქალაქიდან გამოსაყვანი.
ორშაბათს შესაბამის საინფორმაციო რესურსებზე უნდა არსებობდეს კონკრეტული განრიგი, როდის დაიწყება და რომელი ქალაქებიდან საქართველოს მთავრობის მიერ ემიგრანტების გამოყვანა მათთვის მისაღებ ფასებში“, – განაცხადა გახარიამ.
