არჩეული კანდიდატების პარლამენტის პირველ სხდომაზე არ გამოცხადება არ არის ხელახალი ან ვადამდელი საპარლამენტო არჩევნების გამართვის საფუძველი. – ამის შესახებ სოციალურ ქსელში იურისტი ლევან ალაფიშვილი წერს.

ის ხელახალი და ვადამდელი არჩევნების საფუძვლებს განმარტავს.

ხელახალი არჩევნების საფუძვლები:

ვერც ერთმა პარტიამ ვერ გადალახა ბარიერი (1%)

არჩევნები არ ჩატარებულად გამოცხადდა საარჩევნო ოლქების ნახევარზე მეტში (16-30 ოლქი);

არჩევნების შედეგები სასამართლომ სცნო ბათილად;

მაჟორიტარულში ერთი კანდიდატი მონაწილეობდა და კენჭისყრამდე 12 დღეზე ადრე მოიხსნა.

ვადამდელი არჩევნების საფუძვლები:

ახალარჩეული პარლამენტის მიერ მთავრობისათვის ნდობის არგამოცხადება ძველი მთავრობის მიერ უფლებამოსილების მოხსნიდან 1 თვეში;

პრემიერის ინიციატივით მთავრობისათვის ნდობის არგამოცხადება/არ დადასტურება.

„P.S. ახალარჩეული პარლამენტის პირველი სხდომა რომც ვერ გაიხსნას მინიმუმ 76 არჩეული წევრის გამოუცხადებლობის გამო, ამან შეიძლება გამოიწვიოს მხოლოდ კონსტიტუციით გათვალისწინებული ვადების დარღვევა და არა რიგგარეშე ან ხელახალი არჩევნების გამართვა

P.P.S. არჩეული 76 წევრის გამოცხადება საკმარისია, რომ პირველი სხდომა იყოს უფლებამოსილი, ხოლო მინიმუმ 50 წევრის მხარდაჭერა საკმარისია, რომ დადგენილებით სცნონ სრული, 150 დეპუტატის უფლებამოსილება და პარლამენტმა გააგრძელოს საქმიანობა. #წერტილი – წერს ლევან ალაფიშვილი.

ყველა ინფორმაცია საპარლამენტო არჩევნებთან დაკავშირებით ნახეთ ამ ბმულზე