დღეიდან, გურჯაანის მუნიციპალიტეტის სოფელ ველისციხის საჯარო სკოლაში სასწავლო პროცესი დისტანციურ რეჟიმში წარიმართება. ამის შესახებ, ჟურნალისტებთან კახეთის გუბერნატორის მოვალეობის შემსრულებელმა განაცხადა. ირაკლი შიოშვილის განმარტებით, გადაწყვეტილება საკოორდინაციო საბჭომ და განათლების სამინისტრომ მიიღო.
„დღეიდან სკოლა გადავა ონლაინ სწავლებაზე. გადაწყვეტილება საკოორდინაციო საბჭომ, განათლების სამინისტროსთან შეთანხმებით მიიღო, მას შემდეგ, რაც 5 მოსწავლეს კორონა ვირუსი დადუდასტურდა. ჩვენ გვინდა, რომ გავრცელება შევაჩეროთ და მასწავლებლებისა და მოსწავლეების ჯანმრთელობა დავიცვათ“, – განმარტა შიოშვილმა.
გუბერნატორის მოვალეობის შემსრულებელმა, თვითიზოლაციაში მყოფ პირებსა და მათი მხრიდან, დადგენილი რეგულაციების დარღვევაზეც ისაუბრა.
„ჩვენთვის ცნობილია, რომ ზოგიერთი მოქალაქე, რომელიც თვითიზოლაციაში იმყოფება, არღვევს დადგენილ წესებს. კიდევ ერთხელ მოვუწოდებ ყველას, დავემორჩილოთ რეგულაციებს და საფრთხეში ნუ ჩავაგდებთ გარშემომყოფებს“, – განაცხადა შიოშვილმა.
სოფელ ველისციხის საჯარო სკოლაში 540 მოსწავლე ირიცხება. ეპიდემიოლოგიური ვითარების სტაბილიზაციამდე, ისინი სწავლების ონლაინ რეჟიმში დარჩებიან.
ბოლო მონაცემებით, კახეთის რეგიონში კორონავირუსით ინფიცირებულთა რაოდენობამ 90- ს გადააჭარბა.
ავტორი: ხათუნა გულიაშვილი
