“ნაციონალური მოძრაობის” ერთ-ერთი წევრი თინა ბოკუჩავა “ტვ პირველთან” იმ მიზეზის შესახებ ალაპარაკდა, რის გამოც, მის პარტიას “გირჩთან” დაპირისპირება აქვს.
მისი თქმით, მისი პარტია და გირჩი საპარლამენტო ბოიკოტის საკითხზე ვერ თანხმდება.
„ამიტომ ჩავთვალეთ, რომ სამომავლო გეგმების განხილვას ასეთ ფორმატში იმ ადამიანებთან, რომლებთანაც ვერ ვთანხმდებით ყველაზე ფუნდამენტურ და საკვანძო საკითხზე, არ იქნებოდა მიზანშეწონილი. უბრალოდ მე ვიფიქრე, რომ ამას გაიგებდნენ ეს ადამიანები, რომლებმაც შემდეგ შეხვედრა დატოვეს და არასწორი შეფასებები გააკეთეს“, – განაცხადა ბოკუჩავამ.
ამასთან, თინა ბოკუჩავა აცხადებს, რომ „გირჩის“ პოზიციებს გაერთიანებული ოპოზიცია კარგახანია იცნობს. „დღესაც დაიწყეს საუბარი საარჩევნო ბარიერზე. ხომ ვიცით მათი პოზიცია, ამ დროს მე და გიგი სუფთა ჰაერზე გავედით. თუმცა არც მე და არც გიგი სიგარეტს არ ვეწევით, თუმცა არ ვიცით ეს მომენტი სად დაიჭირეს. სხვა ოპოზიციური პარტიებიც გამოვიდნენ გარეთ, რადგან კამათისა და დაპირისპირების და „საქმის გარჩევის“ დრო ოპოზიციაში ნამდვილად არ არის“, – განაცხადა ბოკუჩავამ.
მისი თქმით ქვეყანა დგას სერიოზული განსაცდელის, ხოლო ოპოზიცია გამოწვევის გარეშე. „ამიტომ ჩვენ გვინდოდა გველაპარაკა საქმეზე და ასეც მოხდა მას შემდეგ, რაც ეს ადამიანები წავიდნენ“,-აღნიშნა ბოკუჩავამ.
„გირჩმა“ ოპოზიციის გაერთიანებული შეხვედრა ნაადრევად დატოვა, რის შემდეგაც, პარტიის ლიდერმა, ვახტანგ მეგრელიშვილმა განაცხადა: „შეხვედრა ძალიან მალე დავტოვეთ და მიზეზი იყო ის, რომ ჩვენ რაღაც კითხვები დავსვით და ამ კითხვებზე არათუ პასუხი ვერ მივიღეთ, გავიდნენ გარეთ და სიგარეტის მოწევა დაიწყეს ნაცვლად იმისა, რომ კითხვებზე ეპასუხათ“.
დღეს ოპოზიციური პარტიების წარმომადგენლები „ლეიბორისტული პარტიის“ ოფისში შეიკრიბნენ. პოლიტიკოსები „ნაციონალური მოძრობის“ თავმჯდომარის, ნიკა მელიას დაპატიმრების შემთხვევაში მოქმედების გეგმაზე მსჯელობდნენ.
