„გამარჯვებული საქართველოს“ ყოფილი ლიდერი კოტე კემულარია 2020 წლის საპარლამენტო არჩევნებისთვის მზადებას იწყებს. როგორც კემულარიამ “პრაიმტაიმნიუსთან” განაცხადა, ის მაჟორიტარობისთვის არ იბრძოლებს. ის უახლოეს მომავალში ერთ-ერთ პარტიასთან გაერთიანდება, თუმცა რომელთან – კემულარია არ აკონკრეტებს.
„მე მაჟორიტარობისთვის არ ვიბრძოლებ. მოსალოდნელი არ არის, რომ პარტია შევქმნა. მე რომელიმე პოლიტიკურ ძალასთან გავერთიანდები, თუმცა რომელთან – ჯერ ვერ ვიტყვი“,- განაცხადა კემულარიამ.
კემულარიამ ოპოზიციაში არსებულ უთანხმოებაზეც ისაუბრა და განაცხადა, რომ ამჟამად მის კოლეგებს შორის ჯანსაღი პროცესი მიმდინარეობს.
„ეს ჯანსაღი პროცესია. ოპოზიციაში კრისტალიზაციის პროცესი მიმდინარეობს. ქვეყანაში ახალი საარჩევნო პირობებია შექმნილი. პოლიტიკაში ახალი ხალხი შემოდის. ძალიან კმაყოფილი ვარ, რომ პოლიტიკაში განახლებული და სხვანაირი თაობა მოდის, ეს სარგებლობის მეტს არაფერს მოიტანს. სიხარული, ყიჟინა და ჟივილ-ხივილი, რომ ოპოზიციაში რაღაც სასწაული ხდება, არასწორია. ოპოზიციაში კარგი პროცესი მიმდინარეობს“,- განაცხადა კემულარიამ.
ინფორმაციისთვის, რამდენიმე დღის წინ გაერთიანებული ოპოზიცია „ძალა ერთობაშია“ „ახალი საქართველოს“ ლიდერმა და „კანონი და სამართლის“ დამფუძნებელმა თაკო ჩარკვიანმა დატოვეს.
ავტორი: ეკატერინე ზარნაძე
