ჯანდაცვის მინისტრის, ეკატერინე ტიკარაძის განცხადებით, საპენსიო სქემით დაგროვილი თანხის გამოყენების საკითხს მთავრობის სხდომაზე დააყენებს.
ამ თემით დღეს საკოორდინაციო საბჭოს სხდომის დასრულების შემდეგ გამართულ ბრიფინგზე ჟურნალისტი დაინტერესდა, რომელმაც კითხვით მიმართა მინისტრს, რას ფიქრობდა ზოგიერთი მოქალაქის მოთხოვნაზე, რომ სქემით დაგროვებული თანხა ხელმისაწვდომი უნდა გახდეს, ანუ ვისაც სურვილი აქვს გამოიტანოს საპენსიო ანგარიშზე არსებული თანხა.
„ამასთან დაკავშირებით გვიმსჯელია, თუმცა ვთვლით, რომ ეს არის ხანგრძლივ პერსპექტივაზე გათვლილი რეფორმაა. აქედან გამომდინარე, ამ ეტაპისთვის ეს საკითხი მეორეჯერ განხილვაზე აღარ დაგვიყენებია, თუმცა ვინაიდან ეს მოსახლეობის მოთხოვნაა, კიდევ ერთხელ დავაყენებ საკითხს და ამ თემაზე ვიმსჯელებთ“,- განაცხადა ეკატერინე ტიკარაძემ.
