დღეს ვიწყებთ ბრძოლას მშვიდობიანად და ღირსეულად, როგორც ქართველებს გვეკადრება, – ამის შესახებ „ევროპული საქართველოს“ ლიდერმა, დავით ბაქრაძემ რუსთაველის გამზირზე მიმდინარე აქციაზე სიტყვით გამოსვლისას განაცხადა.
ბაქრაძის თქმით, დღეს დაიწყო ბრძოლა, რომელიც ქართველი ხალხის და საქართველოს გამარჯვებამდე გაგრძელდება.
„16 წელია პოლიტიკაში ვარ და ყველა მიცნობთ. არასდროს ვყოფილვარ და არ ვარ რადიკალური პოლიტიკის მომხრე, მაგრამ თითოეული ჩვენგანის ცხოვრებაში დგება მომენტი, როცა უნდა მივიღოთ გადაწყვეტილება, სად ვდგავართ და რას ვემსახურებით. ვდგავართ საკუთარი კომფორტის, შეგუების და კონფორმიზმის მხარეს, თუ შევდივართ ბრძოლაში და ვართ ღირსების, ჩვენი შვილების მომავლის მხარეს. ამიტომ, გადაწყვეტილება არის ცალსახა – ჩვენ შევდივართ ბრძოლაში, ჩვენ ვდგავართ ჩვენი ღირსების, ჩვენი სამშობლოს და ჩვენი შვილების მხარეს. ამიტომ, თითოეულ თქვენგანს, ვინც ამ ბრძოლაში ხართ, მინდა მადლობა გითხრათ.
დიახ, დღეს არის დასაწყისი და ეს ბრძოლა გაგრძელდება ქართველი ხალხის და საქართველოს გამარჯვებამდე, ეს ბრძოლა გაგრძელდება მანამ, სანამ ამ ქვეყანაში ხალხის ხმა არ იქნება გაგონილი. ეს ბრძოლა გაგრძელდება მანამ, სანამ საქართველოს არ მართავს ქართველი ხალხი და არა ერთი ოლიგარქი. ამიტომ, დღეს ვიწყებთ ბრძოლას მშვიდობიანად და ღირსეულად, როგორც ქართველებს გვეკადრება“, – განაცხადა დავით ბაქრაძემ.
ყველა ინფორმაცია საპარლამენტო არჩევნებთან დაკავშირებით ნახეთ ამ ბმულზე
