კორონავირუსის ჰაერწვეთოვანი გზით გადაცემის მტკიცებულებები ჩნდება, თუმცა ჯერ დამტკიცებას საჭიროებს, – ამის შესახებ განცხადება ჟენევაში გამართულ ბრიფინგზე WHO-ს ინფექციურ დაავადებათა პრევენციისა და კონტროლის ტექნიკურმა ხელმძღვანელმა, ბენედეტა ალეგრანციმ გააკეთა. ინფორმაციას Reuters-ი ავრცელებს.
„საჯარო სივრცეებში, განსაკუთებით ძალიან სპეციფიკურ პირობებში, ხალხმრავალ, დახურულ, ცუდი ვენტილაციის მქონე ადგილებში ჰაერწვეთოვანი გზით გადაცემის შესაძლებლობა არ არის გამორიცხული“, – განაცხადა ალეგრანციმ და აღნიშნა, რომ ჯერ კიდევ არ არის შეგროვებული საკმარისი მტკიცებულებები.
ეს განცხადება ჯანდაცვის მსოფლიო ორგანიზაციაში მას შემდეგ გაკეთდა, რაც ერთ-ერთ სამეცნიერო ჟურნალში 230-ზე მეტმა მეცნიერმა ერთობლივი წერილი გამოაქვეყნა, რომელშიც აცხადებენ, რომ კორონავირუსის ჰაერწვეთოვანი გზით გადაცემის შესაძლებლობა საერთაშორისო ორგანიზაციის მიერ სათანადოდ შეფასებული არ არის.
„ჩვენ გვინდოდა, რომ მათ ეღიარებინათ მტკიცებულებები. ეს არ არის ჯანდაცვის მსოფლიო ორგანიზაციაზე თავდასხმა. ეს არის მეცნიერული დებატები. თუმცა ვფიქრობთ, რომ ჩვენი პოზიცია უნდა გაგვესაჯაროებინა, რადგან ისინი უარს ამბობდნენ, მოესმინათ მტკიცებულებები“, – განაცხადა კოლორადოს უნივერსიტეტის მეცნიერმა ხოსე ხიმენესმა, რომელიც მეცნიერთა ერთობლივი წერილის ერთ-ერთი ხელმომწერია.
