1989 წლის 9 აპრილს საქართველოს ისტორიის ახალი ფურცელი გადაიშალა. ამ დღეს თავისუფლების იდეის გარშემო ერთ მუშტად შეკრული ქართველი ხალხი საბჭოთა კავშირის სადამსჯელო ჯარმა უმოწყალოდ დაარბია, – ამის შესახებ საქართველოს საგარეო საქმეთა მინისტრი, დავით ზალკალიანი სოციალურ ქსელში წერს.
„სწორედ ამიტომ, შემთხვევითი არ არის ის ფაქტი, რომ ორი წლის შემდეგ, სწორედ 9 აპრილს გამოცხადდა საქართველოს დამოუკიდებლობის აღდგენა, რითაც ეს თარიღი, ტრაგიკულ მოგონებასთან ერთად, ეროვნული მისწრაფებების გამოღვიძების, სიამაყისა და გამარჯვების სიმბოლოდ იქცა და არა მხოლოდ, 9 აპრილი ხომ საქართველოს წინაშე ჩვენი წილი პასუხისმგებლობის შეხსენების დღეცაა.
9 აპრილის გმირებმა სათავე დაუდეს ჩვენი ქვეყნის მომავალს და ეს მომავალი ცალსახად ევროპულ სამყაროში ინტეგრაციას უკავშირდება. დიახ, ნატოსა და ევროკავშირში გაწევრიანება საქართველოსთვის ნათელი, მშვიდობიანი და წარმატებული მომავალის გარანტიაა, უფრო მეტიც, ეს არის ხსნის ერთადერთი გზა, რომელიც ჩვენმა ქვეყანამ თავის გაცნობიერებულ არჩევანად, უპირველეს პრიორიტეტად და გაცხადებულ პოლიტიკად აქცია.
დამოუკიდებლობის მოპოვებაზე რთული, სამწუხაროდ, მისი შენარჩუნება გამოდგა. დღეს საქართველოს კვლავ რუსეთის უწყვეტ სამხედრო აგრესიასთან უწევს გამკლავება. ეს აგრესია დღითიდღე ძლიერდება და ჩვენს ქვეყანას ეგზისტენციალურ საფრთხეს უქმნის, თუმცა, ის ვერასდროს შეუქმნის საფრთხეს საქართველოს მისწრაფებას შედგეს ევროპული ტიპის დემოკრატიულ და განვითარებულ სახელმწიფოდ.
დასავლეთში საქართველოს დღეს ბევრად მეტი პარტნიორი და მეგობარი ჰყავს, ვიდრე ოდესმე. მათი მხარდაჭერით, ჩვენ აუცილებლად განვაგრძობთ დასავლური ღირებულებებისა და იდეალებისკენ სწრაფვას. ჩვენ აუცილებლად დავუბრუნდებით ჩვენს ევროპულ ფესვებს და ჩვენ აუცილებლად მოვიპოვებთ ტერიტორიულ მთლიანობას“ – წერს დავით ზალკალიანი.
