ჩვენ ყველა ვთანხმდებით, როგორც საქართველო, ისე შეერთებული შტატები, რომ თავდაცვის და უსაფრთხოების სფეროში ჩვენი თანამშრომლობა უაღრესად აღმავალია, – ამის შესახებ დავით ზალკალიანმა განაცხადა. საგარეო საქმეთა მინისტრმა აეროპორტში შეკრებილ ჟურნალისტებს განუცხადა, რომ ჯერ კიდევ წინა ადმინისტრაციის დროს, 2016 წელს გაფორმდა მემორანდუმი ამ სფეროში თანამშრომლობის შესახებ, რომელიც კარგად შესრულდა, ამ მიმართულებით საქმიანობა ტრამპის ადმინისტრაციასთანაც გაგრძელდა.
„ამერიკის შეერთებულმა შტატებმა საქართველოს გადმოსცა ჯაველინების სისტემა ჩვენი თავდაცვის, მდგრადობის გასაძლიერებლად. ეს არის ის კონკრეტული მაგალითები,რაზეც დგას ჩვენი თანამშრომლობა, რაც აძლიერებს ჩვენს მდგრადობას იმ გამოწვევების წინაშე, რომელთა წინაშეც დგას საქართველო. ამიტომ ამ ვიზიტის ფარგლებში ყველა ამ საკითხზე გვექნება შეფასება – სად ვართ, სად ვიმყოფებით, და რა ნაბიჯები უნდა გადაიდგას წინ, იმისთვის რომ ამერიკასა და საქართველოს შორის იყოს მუდმივი სიმჭიდროვე ამ ურთიერთობების“,- აღნიშნა ზალკალიანმა.
მინისტრმა ასევე ხაზი გაუსვა იმ სამხედრო წვრთნებს, რომლებიც ნატოს ფარგლებში საქართველოს ხელმძღვანელობით ჩატარდა.
