უკრაინის პრეზიდენტმა, ვლადიმირ ზელენსკიმ გაერო-ს გენერალურ ასამბლეაზე სიტყვით გამოსვლისას ყირიმის დეოკუპაციასთან დაკავშირებით მოწყობილ ყირიმის პლატფორმაზე ისაუბრა, რომელშიც მონაწილეობა მიიღო 46-მა სახელმწიფომ და საერთაშორისო ორგანიზაციამ. ვლადიმირ ზელენსკიმ გაერო-ს წევრებს მოუწოდა, შეუერთდნენ ყირიმის პლატფორმის ერთობლივ დეკლარაციას, დაგმონ ოკუპაცია და ამით აჩვენონ, რომ ისინი მსოფლიოში საზღვრების ძალისმიერი გზით ცვლილების წინააღმდეგნი არიან. ვლადიმირ ზელენსკი ასევე გამოვიდა ინიციატივით, რომ ყირიმის პლატფორმა გაერო-ს ეგიდით წარიმართოს.
პრეზიდენტმა ასევე მოუწოდა გაერო-ს წევრებს, კვლავ დაუჭირონ მხარი განახლებულ რეზოლუციებს ოკუპირებულ ყირიმში ადამიანის უფლებათა დაცვის კუთხით არსებულ ვითარებასთან დაკავშირებით, რომელსაც უკრაინა გენერალურ ასამბლეაში წლის ბოლომდე წარადგენს.
ზელენსკიმ გაიხსენა, რომ 2019 წელს ამავე ტრიბუნიდან მიმართვისას, მან უკრაინის ომში დაღუპულ 13 000, დაშავებულ 30 000 და იძულებით გადაადგილებულ 1.5 მილიონ მოქალაქეზე ამცნო, მას შემდეგ კი, ყოველწლიურად ეს ციფრები იზრდება.
პრეზიდენტმა ასევე ყურადღება გაამახვილა რამდენიმე საათით ადრე, მის თანაშემწეზე განხორციელებული შეიარაღებული თავდასხმის შესახებ და აღნიშნა, რომ ეს არის რეფორმებისა და ცვლილებების ფასი უკრაინაში.
