გერმანიის ფედერალური პროკურატურა და სისხლის სამართლის საქმეთა ფედერალური უწყება ზელიმხან ხანგოშვილის მკვლელობასთან კავშირში მყოფი მეორე ადამიანის კვალზე გავიდნენ. ამის შესახებ ინფორმაციას Der Spiegel-ი ავრცელებს.
გამოცემა წერს, რომ გერმანელი სამართალდამცავების მხედველობის არეალში კიდევ ერთი ადამიანი მოხვდა – ვინმე რომან დ., რომელმაც შენგენის ვიზის მისაღებ საბუთებში იგივე სამსახური მიუთითა, რომელიც საქმეში არსებულ ერთადერთ ეჭვმიტანილ ვადიმ კ.-ს აქვს მითითებული.
მათივე ინფორმაციით, ემთხვევა ვიზაზე საბუთების შეტანის თარიღიც. რომან დ. ევროკავშირის ტერიტორიაზე პოლონეთის გავლით 2019 წლის 3 აგვისტოს – მკვლელობამდე ორი კვირით ადრე მანქანით შევიდა და გერმანია 9 აგვისტოს დატოვა. პასპორტის მიხედვით რომან დ. რუსეთის მოქალაქეა პეტერბურგიდან.
გამომძიებლები მის სახელს ახსენებენ ვადიმ კ.-ს საბრალდებო დასკვნაში. ისინი ეჭვობენ, რომ რომან დ. შესაძლოა მონაწილეობდეს ზელიმხან ხანგოშვილის მკვლელობის მომზადებაში.
მობილური ტელეფონების მონაცემების თანახმად, ხანგოშვილის მკვლელობამდე რამდენიმე თვით ადრე ვადიმ კ. და რომან დ. რუსეთის ქალაქ ორეხოვო-ზუევოში იმყოფებოდნენ, სადაც ФСБ-ს სპეციალური ძალების საწვრთნელი ბაზა მდებარეობს.
