ზუგდიდის მუნიციპალიტეტის საკრებულოს სხდომა, რომელზეც თავმჯდომარე უნდა აერჩიათ, ისევ ერთი კვირით გადაიდო.
სხდომა დატოვა “ერთიანმა ნაციონალურმა მოძრაობამ”.
„ჩვენმა გუნდმა მიიღო გადაწყვეტილება დღეს კენჭისყრაში არ მიიღოს მონაწილეობა და დატოვოს დარბაზი. ეს არის ერთგვარი კრიზისის მოცემულობა და ეს კრიზისი ბუნებრივია შექმნა არჩევნების შემდეგ ხელისუფლების მიერ და კონკრეტულად პოლიტიკური გუნდის “ქართული ოცნების” მიერ. კონკრეტულად არ მინდა პერსონიფიცირება, ეს მოხდა მთლიანად სისტემის გამო, რომელმაც პირდაპირი გაგებით წაგვართვა მანდატი და ამან შეგვიყვანა ჩიხში“, – განაცხადა ენმ -ს წარმომადგენელმა თემურ ბასილაიამ.
ენმ-ის მიერ სხდომის დატოვების შემდეგ ქვორუმი ვერ შედგა, ვინაიდან, “ქართული ოცნების” დეპუტატი, მამუკა ყურაშვილი ჯანმრთელობის მდგომარეობის გამო, სხდომას არ ესწრებოდა.
ზუგდიდის მუნიციპალიტეტის საკრებულოს სხდომაზე დეპუტატებმა თავმჯდომარის არჩევა გასულ კვირასაც ქვორუმის არარსებობის გამო ვერ შეძლეს, რადგან სხდომა ენმ-ის დეპუტატებმა დატოვეს, ამის შემდეგ, იგივე გადაწყვეტილება ექსპრემიერის გუნდის, “გახარია-საქართველოსთვის” წევრებმა მიიღეს.
შესაბამისად საკრებულოს აპარატის უფროსმა ნატა პაპასკირმა განმარტა, რომ საკრებულოს სხდომა ვერ გაგრძელდებოდა.
მანამდე, სამანდატო კომისიის თავმჯდომარე სანდრო სორდიამ განაცხადა, რომ თუ სხდომას გახარიას პარტიის წარმომადგენლები დატოვებდნენ, და თუ ვერც მომდევნო სხდომაზე ვერ აირჩევდნენ საკრებულოს თავმჯდომარეს და თანამდებობის პირებს, ეს მუნიციპალიტეტის კრიზისისთვის გაწირვას ნიშნავს.
წინა სხდომაზე, ზუგდიდის ახლადარჩეულ საკრებულოში ორი ფრაქცია დაფუძნდა. “ზუგდიდი საქართველოსთვის”, რომლის თავმჯდომარე გიგა ფარულავა გახდა. მისი მოადგილე მალხაზ თორიაა.
ამასთან, შეიქმნა ფრაქცია “ოცნება-დემოკრატიული საქართველო”. თავმჯდომარე ირაკლი გოგოხია გახდა. მას 6 მოადგილე ჰყავს.
საკრებულოში ასევე შეიქმნა ენმ-ს ფრაქცია,რომლის თავმჯდომარედ თეიმურაზ ბასილაია დაინიშნა,ხოლო მოადგილედ კახაბერ ჩანგელია.
ავტორი: თეა შონია
