“მედიატორთან შეხვედრა გამოვიყენეთ იმისთვის, რომ ძალიან დეტალურად განგვეხილა ჩვენი პოზიციები ყველა საკითხთან დაკავშირებით, კონკრეტულად იმ 6 პუნქტზე, რომელიც პრეზიდენტ მიშელის სამოქმედო გეგმაშია ჩამოყალიბებული”, – ამის შესახებ “ნაციონალური მოძრაობს” წევრმა სალომე სამადაშვილმა დანიელსონთან შეხვედრის შემდეგ განაცხადა.
მისივე თქმით, შეხვედრაზე ვადამდელ არჩევნებამდე მისვლის გზებზე ისაუბრეს.
ზოგიერთ საკითხზე გვქონდა უფრო ფუნდამენტური დისკუსია, სხვებზე შევთანხმდით მონახაზზე, მაგრამ ერთი რამ არის ნათელი, ეს არის ჩვენი პოზიცია, რომელიც დღეს ჩვენ კიდევ ერთხელ დავაფიქსირეთ. არსებობს ისეთი საკითხები, რომლის მოგვარებაც გახსნის გზას შეთანხმებისთვის და არსებობს საკითხები, რომელზეც შეიძლება შეთანხმება, მას შემდეგ, რაც ჩვენ გადავჭრით მთავარ პრობლემებს.
აქ ვერაფერ ახალს ვერ გეტყვით, პირველ რიგში, მიგვაჩნია, რომ პოლიტპატიმრების თემა ამოიწუროს და მოლაპარაკებების მაგიდასთან, მაგალითად, ჩვენს პარტიას წარმოადგენდეს ნიკა მელია და შესრულდეს 8 მარტის შეთანხმება და გიორგი რურუა გათავისუფლდეს. გარდა ამისა, ვადამდელი არჩევნები არის ჩვენთვის ძალიან მნიშვნელოვანი თემა და ამ პოზიციის გადახედვა იცით, რომ არ მომხდარა. გზები, როგორ შეიძლება მივიდეთ ამ არჩევნებამდე არსებობს სხვადასხვა და სწორედ ამაზე გვქონდა საუბარი”, – განაცხადა სალომე სამადაშვილმა.
ცნობისთვის, კრისტიან დანიელსონი საქართველოში არსებული პოლიტიკური ვითარების განმუხტვის მიზნით დედაქალაქს გამთენიისას ეწვია.
დანიელსონი საქართველოში 14 მარტამდე დარჩება.
