ეროვნულ გამოცდაზე PCR ტესტირების თაობაზე ცნობა არც ერთ აბიტურიენტს არ წარმოუდგენია. ამის შესახებ შეფასებისა და ეროვნული გამოცდების ცენტრის დირექტორმა სოფიო გორგოძემ ჟურნალისტებთან საუბრისას განაცხადა.

მისივე თქმით, ცნობები მიიღეს მხოლოდ ქრონიკული სიცხის თაობაზე.

„ჩვენდა გასაკვირად, ცნობები იყო მხოლოდ ქრონიკული სიცხის თაობაზე, დღეის მდგომარეობით არც ერთი ცნობა PCR ტესტირების თაობაზე არ იყო შემოსული“, – აღნიშნა სოფიო გორგოძემ.

„პრაიმტაიმის“ კითხვაზე ხომ არ არის შესაძლებელი საგამოცდო ადგილზე, სწრაფი ტესტის ჩატარება იმ აბიტურიენტებისთვის, რომელთაც ტემპერატურა დაუფიქსირდებათ, სოფო გორგოძე ამბობს, რომ არსებული რეგულაციის გათვალისწინებით ამ ეტაპზე მსგავსი რამ არ იგეგმება.

მისივე განცხადებით, აბიტურიენტებს რომელთაც გამოცდის დაწყებამდე ტემპერატურა დაუფიქსირდებათ ავტომატურად იხსნებიან გამოცდიდან და მიეცემათ რეკომენდაცია ჩაიტარონ PCR შემოწმება.

ცნობისთვის, გამოცდიდან დღეს სხვადასხვა მიზეზის გამო სულ 5 აბიტურიენტი მოიხსნა .

2 აბიტურიენტს ტემპერატურა დაუფიქსირდა, 2-მა გამოცდაზე დააგვიანა, ხოლო ერთი მათგანი ტელეფონი გამოყენების გამო მოიხსნა.