„თქვენი მოტივაციაა, რომ ვიღაცებმა ირბინონ, რაღაც არიონ, ქაოსი მოაწყონ. არ გინდათ და ხელს არ აწერთ. ატყუებთ ხალხს, ეს ხალხი არ ტყუვდება და რამდენჯერ უნდა სცადოთ?“,-ასე უპასუხა საპარლამენტო უმრავლესობის ლიდერმა მამუკა მდინარაძემ „ნაციონალური მოძრაობის წევრის რომან გოცირიძის მოთხოვნას საარჩევნო კოდექსთან დაკავშირებით.
როგორც მამუკა მდინარაძე ამბობს, კოდექსში ვერ ჩაიწერება, რომ 25-მეტრის რადიუსში საარჩევნო უბნებთან არავინ იგდეს, თუმცა, ამის დარეგულირება მემორანდუმით შეიძლება.
„საბურთალოს ქუჩაზე, სადაც მე ხმას ვაძლევ, 10 მეტრში არის გაჩერება და თქვენ ითხოვთ არავინ არ იდგესო და ჩვენ გეუბნებით, ამას კანონში ვერ ჩავწერთ, მაგრამ მემორანდუმი გავაფორმოთ, ყველა პარტიამ აიღოს პასუხისმგებლობა თავისი პარტიული აქტივი არ შევიდეს ამ რადიუსში. მემორანდუმი არის ყველას პასუხისმგებლობა და ამის აღება არ გინდათ, მერე ვიღაც მობილური ტელეფონით გადაიღებს, რომ შევარდნენ „ნაციონალური მოძრაობის“ პარტიული აქტივის წარმომადგენლები და იქ რაღაცები აკეთეს. ეს არ გინდათ. ჩვენი მოტივაცია გითხარით რა არის“ – მიმართა მდინარაძემ რომან გოცირიძეს.
ცნობისთვის, ფრაქცია „ნაციონალური მოძრაობის“ თავმჯდომარე რომან გოცირიძე უმრავლესობას მოუწოდებს, რომ კანონში ჩაიწეროს ის საკითხი, რომლის დარეგულირებასაც ხელისუფლება მემორანდუმით ითხოვს.
