„რესპუბლიკური პარტიის“ ლიდერი დავით ბერძენიშვილი საქართველოს ყოფილი პრეზიდენტის, მიხეილ სააკაშვილის იმ განცხადებამ აღაშფოთა, რომელშიც სააკაშვილმა 7 ნოემბრის აქციის მონაწილეები რუსეთის პრეზიდენტის, ვლადიმერ პუტინის გეგმის ნაწილად გამოაცხადა. დავით ბერძენიშვილი მიიჩნევს, რომ „მიხეილ სააკაშვილმა კლასი დაკარგა“ .
როგორც ბერძენიშვილი „პრაიმტაიმთან“ აცხადებს, სააკაშვილი პოლიტპატიმარია, თუმცა მან სასამართლო პროცესზე 7 ნოემბრის აქციის შეფასებისას, შეცდომა დაუშვა.
„მიშა სააკაშვილი პოლიტპატიმარია. ასე, რომ მე სააკაშვილის მიმართ სოლიდარულად ვარ განწყობილი. უბრალოდ, მე შევეხე 7 ნოემბრის საკითხს, რაზეც მას შეცდომა მოვიდა, კერძოდ, მან 7 ნოემბრის მონაწილეები აგენტებად და ბრიყვებად დაყო, რაც არ იყო სწორი. შესაბამისად, ეს საკითხი შევაფასე კიდეც, პატიმრის კვალობაზე შეფასებებში სიმკვეთრე არ დამიკლია.
„კითხვაზე, სააკაშვილის მიმართ, რომელი ბრალდებაა, მისი შეფასებით, პოლიტიკურად მოტივირებული, ბერძენიშვილი გვპასუხობს:
„მაგას „რესპუბლიკურ პარტიას“ გვასწავლით? სანდრო გირგვლიანის მკვლელების შეწყალების საკითხზე მეკითხებით? მითუმეტეს, ამ სასამართლოს შეწყალების საკითხზე არ ვეთანხმები. ამ საქმეებიდან სააკაშვილის მთავარი პრობლემა არის ვალერი გელაშვილის საქმე და 7 ნოემბრის საქმე, მაგრამ ის მაინც პოლიტიკური მოტივებით არის დაკავებული და არის პოლიტპატიმარი“,- განაცხადა ბერძენიშვილმა.
შეგახსენებთ, მიხეილ სააკაშვილმა ბადრი პატარკაციშვილზე სასამართლო დარბაზში ისაუბრა. მისი თქმით, რუსეთის პრეზიდენტმა ვლადიმერ პუტინმა 2007 წელს ბელარუსის პრეზიდენტს ალექსანდრ ლუკაშენკოს გამოუცხადა, რომ ბადრი პატარკაციშვილი საქართველოს შემდეგი პრეზიდენტი უნდა ყოფილიყო.
“ამის შემდეგ იწყება კამპანია, რომ უნდა იყოს პატარკაციშვილის ორგანიზებული და დაფინანსებული დიდი გამოსვლები“, – განაცხადა ბრალდებულმა ექსპრეზიდენტმა.
ცნობისთვის, მიხეილ სააკაშვილი სამი ინსტანციის სასამართლოს განაჩენით, დამნაშავედ არის ცნობილი ვალერი გელაშვილის ცემისა და სანდრო გირგვლიანის სისხლის სამართლის საქმეებზე. მას სასჯელის ზომად განსაზღვრული აქვს თავისუფლების აღკვეთა ექვსი წლის ვადით.
ასევე, მიხეილ სააკაშვილი ბრალდებულია ტელეკომპანია „იმედის“ დარბევის, 7 ნოემბრის დარბევის, პატარკაციშვილების ქონების უკანონოდ დაუფლებისა და სახელმწიფო დაცვის სპეციალური სამსახურის კუთვნილი 9 024 367 ლარის პირადი მიზნებისთვის გაფლანგვის ფაქტებზე.
ავტორი: ეკატერინე ზარნაძე
