კოლექტიური უსაფრთხოების შეთანხმების ორგანიზაციის სამდივნო სომხეთ-აზერბაიჯანის საზღვარზე დაპირისპირებასთან დაკავშირებით განცხადებას ავრცელებს.
„ხაზს ვუსვამთ კოლექტიური უსაფრთხოების შეთანხმების ორგანიზაციის პასუხისმგებლობაში მყოფ ტერიტორიაზე ცეცხლის შეწყვეტის რეჟიმის დაუყოვნებლივ ამოქმედების საჭიროებას. გამოვთქვამთ მწუხარებას დაღუპულთა ნათესავებსა და ახლობლების გამო, ხოლო დაჭრილებს სწრაფად გამოჯანმრთელებას ვუსურვებთ.
ხაზს ვუსვამთ, რომ კოლექტიური უსაფრთხოების საბჭომ და ორგანიზაციის საგარეო საქმეთა მინისტრთა საბჭომ, თავის გამოსვლებში არაერთხელ მოუწოდეს ქვეყნებს, დაძაბულობის ესკალაციის პრევენციის მიზნით, კონფლიქტის მშვიდობიანი მეთოდებით დარეგულირებისკენ და პროვოკაციული ქმედებებისგან თავის შეკავებისკენ“, – ნათქვამია განცხადებაში.
განცხადებაში ასევე ნათქვამია, რომ ორ მეზობელ ქვეყანას შორის არსებული ვითარება, საზღვარზე სიტუაციის ნორმალიზებას ხელს არ უწყობს და აზერბაიჯანისა და სომხეთის ხელმძღვანელობებს შორის მიღწეული ცეცხლის შეწყვეტის შეთანხმების დარღვევას მოწმობს.
შეგახსენებთ, რომ სომხეთის შეიარაღებულმა ძალებმა ტოვუშის რაიონში, აზერბაიჯანის სოფელ აგდამისა და ალიბეილის მიმართულებით საარტილერიო ცეცხლი დილიდან ისევ გახსნეს.
ვრცელდება ინფორმაცია, სომხეთის იერიშის შედეგად აზერბაიჯანში გენერალი და სამხედრო პოლკოვნიკი დაიღუპნენ.
მსხვერპლის შესახებ ინფორმაცია სომხურმა მხარემაც გამოაქვეყნა.
აზერბაიჯანი-სომხეთის საზღვარზე სომეხ და აზერბაიჯანელ სამხედროებს შორის დაპირისპირება 12 ივლისს დაიწყო.
ცნობისთვის, ბაქოს და ერევანს წლებია კონფლიქტი აქვთ აზერბაიჯანის საერთაშორისოდ აღიარებული რეგიონის, მთიანი ყარაბაღის გარშემო. სომხეთის მიერ მხარდაჭერილმა სეპარატისტებმა აზერბაიჯანის ეს, ძირითადად სომხებით დასახლებული რეგიონი ადრეული 1990-იანი წლების ომით მოიპოვეს. ომს 30,000-მდე ადამიანი შეეწირა. კონფლიქტის გადაჭრის დიპლომატიურ მცდელობებს მნიშვნელოვანი პროგრესი არ მოჰყოლია.
