ქობულეთში, სტატისტიკის სამსახურის ყოფილ შენობაში თვითნებურად შესახლებული სოციალურად დაუცველი ოჯახები მთავრობის სახლთან აქციას მართავენ. აქციის მონაწილეების განცხადებით შენობა, სადაც ცხოვრობენ, აუქციონის წესით ქობულეთის საკრებულოს დეპუტატმა მალხაზ რომანაძემ იყიდა და არჩევნების შემდეგ შენობიდან მათ გამოსახლებას აპირებს.
შეგახსენებთ, სტატისტიკის სამსახურის შენობაში თვითნებურად შესახლებულებმა გუშინ აქცია ქობულეთის მერიასთანაც გამართეს.
აქციის ორ მონაწილეს ქობულეთის მერი მირიან ქათამაძე შეხვდა. როგორც აქციის ერთ-ერთი მონაწილე, მზევინარ ვანაძე აცხადებს, 8 წელია თვითნებურად შესახლდა ქობულეთში თავისუფლების 19-ში, სადაც მხოლოდ ანტისანიტარია და მოუწესრიგებელი ინფრასტრუქტურა იყო.
„ჩვენი შრომით გავაკეთეთ ყველამ, 12 ოჯახი ვართ. და ახლა გავიგეთ ერთი კვირის წინ რომ.ეს შენობა უყიდია საკრებულოს წევრს მალხაზ რომანაძეს. მივმართეთ მერიას, გაგვეგო, რას გვიპირებენ ჩვენ. მხოლოდ ზეპირად გვპირდებიან, არ გამოგვასახლებენ. მაგრამ ჩვენ ვითხოვთ ოფიციალურად დოკუმენტებით დაგვიკანონოს ეს ფართები ან დაგვაკმაყოფილონ ყველა ალტერნატიული საცხოვრებელი ფართით. ჩვენ.გარდა კიდევ სხვა ბინის მობინადრეებიც არიან აქ. ყველა სოციალურად დაუცველია. ვთხოვთ მთავრობის თავმჯდომარეს, დაგვეხმაროს“, – განაცხადა ვანაძემ.
გია ქამადაძის განცხადებით, ფიქრობს რომ არჩევნების შემდეგ სახლიდან გამოყრიან.
„მირიან ქათამაძე მხოლოდ სიტყვიერ დაპირებას გვაძლევს, რა გარანტია გვაქვს, რომ არ გამოგვასახლებენ? ძალიან ბევრ რამეს გვპირდებიან, მაგრამ არაფერს არ აკეთებენ. როგორ ვენდოთ? დამიჯერეთ, არჩევნები რომ ჩატარდება, იმ წამსვე გამოგვყრიან სახლებიდან“, – განაცხადა აქციის კიდევ ერთმა მონაწილემ გია ქამადაძემ.
ავტორი: ნაირა ქობულაძე
