“შაჰინმა ტრამპს მიანიშნა, რომ სააკაშვილიც კი, რომელიც არადემოკრატიული ლიდერი იყო, არჩევნების წაგების შემდეგ მშვიდობიანად წავიდა ხელისუფლებიდან, ფაქტობრივად სააკაშვილს შეადარა”, – ამის შესახებ საპარლამენტო უმრავლესობის წევრმა გიორგი ხელაშვილმა ჟურნალისტებთან განაცხადა, რითაც ამერიკელი სენატორის, ჯინ შაჰინის განცხადებას გამოეხმაურა.
“ჯინ შაჰინმა მოიყვანა პოლიტიკური არგუმენტი საკუთარი ქვეყნის შიგნით, მან ტრამპს მიანიშნა, რომ სააკაშვილიც კი, რომელიც იყო არადემოკრატიული ლიდერი, არჩევნების წაგების შემდეგ მშვიდობიანად წავიდა ხელისუფლებიდან, ეს არ მგონია ყოფილიყო მაგალითი, მან მოიყვანა ისტორიული მაგალითი. ხალხის ნების წინააღმდეგ წასვლა არ შეიძლება -ეს იყო ძირითადი მესიჯი, რომელიც შაჰინმა გააჟღერა ტრიბუნიდან. სენატორი შაჰინი არის დემოკრატი, შესაბამისად ის უპირისპირდება პრეზიდენტ ტრამპს და მან გამოიყენა სწორედ ეს არგუმენტი რესპუბლიკელი ტრამპის წინააღმდეგ, დაადანაშაულა ის და ფაქტობრივად სააკაშვილს შეადარა, რაც არ მგონია, რომ მაინც და მაინც დადებითი შედარება იყოს პრეზიდენტ ტრამპისთვის,”- განაცხადა ხელაშვილმა.
