ვინ და რატომ ჩააბარა საქართველოს კუთვნილი ტერიტორიები აზერბაიჯანულ მხარეს?! – კავკასიის საკითხებში ექსპერტი მამუკა არეშიძე მიიჩნევს, რომ საქართველო-აზერბაიჯანის საზღვრის დამდგენი დელიმიტაციისა და დემარკაციის ქართული სამთავრობო კომისიის წევრთა ნაწილი ანტისახელმწიფოებრივ ქმედებას ეწეოდა და მათმა ნაწილმა ქვეყნის გარკვეული ნაწილი აზერბაიჯანს მოღალატეობრივად ჩააბარა.
ექსპერტი ამ სკანდალური განცხადების მთავარ ადრესატებს არ ასახელებს და აცხადებს, რომ ყველაფერს გენერალური პროკურატურა დაადგენს.
„96 წლიდან მოყოლებული კომისიაში იყო სულ მცირე ერთი კაცი, რომელის კეთილსინდისიერებაში სულ მეპარებოდა ეჭვი. სახელსა და გვარს, არ დავასახელებ. პროკურატურის განცხადებაში დამტკიცდა, რომ ეს ასე იყო. ასევე, მინდა ავღნიშნო, პროკურატურის განცხადებაში იყოს ძალიან მნიშვნელოვანი საკითხი დაყენებული – არა მხოლოდ კომისიის მუშაობის დროს მოხდა ტერიტორიის განსაზღვრა, არამედ დაშვებული იყო სხვა შეცდომები, ღალატის ტოლფასი ქმედებები.
საქმე ის არის, რომ კომისიამ თავის დროზე 90-იანი წლების შუაში მუშაობა ისე დაიწყო, რომ პრაქტიკულად, შესაბამისი დოკუმენტაცია უკვე იყო გამქრალი, იგულისხმება 20-იანი, 30-იანი, 40-იანი წლების რუკები და სხვა წლების დოკუმენტები, რომელთა მიხედვით უნდა დაწყებულიყო მუშაობა, საქართველოს კომისია კი მუშაობდა ცარიელი ხელებით.
არა მხოლოდ კომისიის წევრები იყვნენ ამაში დამნაშავეები, არამედ ის ადამიანები რომლებიც პასუხს აგებდნენ ამ არქივების შენარჩუნებაზე. დადგა დრო, რომ ყველა მოღალატემ პასუხი აგოს იმაზე, რაც თავის დროზე ქვეყანას დაუშავეს. ეს იყო მოსყიდვა, აბა სხვა რა იქნებოდა?! ვისი მხრიდან, ამის თქმა არ შემიძლია“,- განაცხადა არეშიძემ.
შეგახსენებთ, საქართველოს ტერიტორიის ნაწილის უცხო ქვეყნისთვის გადაცემის ფაქტზე გენერალურმა პროკურატურამ გამოძიება დაიწყო.
უწყების ინფორმაციით, გამოძიების დაწყებას საფუძვლად დაედო საქართველოს თავდაცვის სამინისტროს წერილობითი ინფორმაცია, რომელიც შეეხება საქართველოს სახელმწიფო საზღვრების დელიმიტაციისა და დემარკაციის სამთავრობო კომისიის საქმიანობას.
როგორც პროკურატურაში აცხადებენ, კომისიის მიერ საქართველო-აზერბაიჯანის სახელმწიფო საზღვრის გარკვეული მონაკვეთები არამართლზომიერად, ჩვენი ქვეყნის ტერიტორიული ინტერესების საზიანოდ შეთანხმდა.
ავტორი: ეკატერინე ზარნაძე
