ამ წუთებში ხელვაჩაურის მუნიციპალიტეტის სოფელ შარაბიძეებში  იარაღის უკანონო შეძენა-შენახვისთვის დაკავებული 54 წლის რევაზ შარაბიძის ოჯახის წევრები და ახლობლები აქციას მართავენ. როგორც ისინი აცხადებენ, დაკავებული უდანაშაულოა და მას პოლიციამ იარაღი ჩაუდო.

„არ იყო მისი იარაღი. პოლიციამ ჩაუდო, რატომ, არ ვიცით და დაიჭირეს. სახლში არ იყო, სადღაც გარეთ ეზოში, სახლის უკანა მხარეს, შავ ცელოფანში გახვეული იპოვეს თითქოს.  არ დასწრებია არავინ იარაღის ამოღების ფაქტს. რომ არ ვიყოთ დარწმუნებული მის  უდანაშაულობაში, არ გამოვიდოდით და აქციას არ გავმართავდით.

დღეს აქციის სამი მონაწილე დააკავეს კიდე, ერთ-ერთი რევაზ შარაბიძის შვილი და მისი ორი მეგობარი. ესენი აქციის დაწყებამდე დააკავეს ხულიგნობისა და პილიციისადმი დაუმორჩილებლობისათვის თითქოს.  ამით ფიქრობენ დავიშლებით. არ ვიცით სად ყავთ დაკავებულები და არც გვეუბნებიან. ჩალით ხომ არ არის დახურული ქვეყანა”- აცხადებს აქციის ერთ-ერთი მონაწილე.

როგორც დაკავებული რევაზ შარაბიძის ადვოკატი ზაზა პაპიძე აცხადებს, ამ ეტაპზე საქმის მასალებს არ იცნობს და კომენტარს ვერ გააკეთებს

„გუშინ ღამის ორ საათზე დაახლოებით დააკავეს იარაღის უკანონო შეძენა-შენახვისთვის რევაზ შარაბიძე. ნათესავები, ახლობლები, მეგობრები სწორედ ამ უკანონო დაკავებას აპროტესტებენ, რადგან,  როგორც ამბობენ, არ არის ჩადებული, მას არ ეკუთვნოდა იარაღი. სწორედ ამ მიზნით გაიმართა დღეს აქცია. პროტესტი რომ მასშტაბური არ გამხდარიყო, რამდენიმე მოქალაქე დააკავეს ადმინისტრაციული წესით.

პოლიცია, რომელიც ხელს უნდა უწყობდეს მოქალაქეებს მშვიდობიანი პროტესტის გამოხატვაში, პირიქით, ხელს უშლის და აკავებს, რაც ერთგვარად დაშინებას ნიშნავს. დაკავებულს შევხვდი, ჩემი იარაღი არ არისო აცხადებს ის. აღსანიშნავია, რომ სახლში არ არის ამოღებილი, არამედ მიმდებარე ტერიტორიაზე. ამ ეტაპზე საქმის მასალებს არ ვიცნობ. სანამ საქმის მასალებს არ გავეცნობი მეტი არაფრის თქმა არ შემიძლია.

დღევანდელ დაკავებულები არ მინახავს ჯერჯერობით. დააკავეს წვრილმანი ხულიგნობისთვის, რაც ასევე უსაფუძვლო და უკანონოა. ხულიგნობას ადგილი არ ჰქონია. ამას მოქალაქეები ადასტურებენ.  მშვიდობიანი აქცია იყო, მაგრამ ეს დაშინების მიზნით მოხდა“ – აცხადებს ადვოკატი ზაზა პაპიძე.

აქციის მონაწილეები პერმანენტულ აქციებს აანონსებენ და გზის გადაკეტვასაც არ გამორიცხავენ, თუ კი დაკავებულებს არ გაათავისუფლებენ.

ავტორი: ნაირა ქობულაძე