საქართველოს ყოფილი პრეზიდენტის, მიხეილ სააკაშვილის გორის ჰოსპიტალში გადაყვანის შემდეგ, „ნაციონალურმა მოძრაობამ“ სამომავლო გეგმის წარდგენა დააანონსა, რაც „პრაიმტაიმის“ ინფორმაციით, თბილისსა და რეგიონებში მასშტაბური საპროტესტო აქციების გამართვას ისახავდა მიზნად.
აქციებზე შემდეგი მოთხოვნები უნდა დაწყენებულიყო – მიხეილ სააკაშვილის გათავისუფლება, მისთვის მოქალაქეობის აღდგენა და რიგგარეშე არჩევნების დანიშვნა.
რა შეიცვალა ოპოზიციური პარტიის გეგმაში?
როგორც „ნაციონალური მოძრაობის“ წევრი რომან გოცირიძე „პრაიმტაიმთან“ აცხადებს, პარტიის სტრატეგია არ შეცვლილა და საზოგადოება, მათ შორის, მასშტაბურ აქციებს მალე იხილავს.
„აქციები იქნება მასშტაბური და არამასშტაბურიც. იქნება ქუჩაში მსვლელობა და პიკეტირებაც. ჩვენ ვხედავთ, რომ ყველა აქციას თავისი ეფექტი აქვს. ასევე, ვხედავთ, რომ სასამართლოსთან აქციები იმართება, ამ ყველაფერს თვალს ადევნებს ბევრი ქვეყანაც. ეს პროტესტი დაწყებულია და არ გაჩერდება, რადგან არავის არა აქვს იმის ილუზია, რომ სასამართლოში რამე წყდება“,- განაცხადა გოცირიძემ.
კითხვაზე, რატომ არ მართავს პარტია ამჟამად მასშტაბურ აქციებს, გოცირიძე გვასუხობს, რომ ყველაფერს თავისი დრო აქვს.
შეგახსენებთ, საქართველოს ყოფილი პრეზიდენტი მიხეილ სააკაშვილი მის მიმართ წარდგენილ ბრალდებებს არ აღიარებს, რის გამოც მან შიმშილობა გამოაცხადა. ყოფილმა პრეზიდენტმა აღნიშნული პროტესტის შეწყვეტა იმ შემთხვევაში დააანონსა, თუ მას საქალაქო კლინიკაში გადაიყვანდნენ, ხელისუფლებამ მისი მოთხოვნა დააკმაყოფილა და სამკურნალოდ გორის ჰოსპიტალში გადაიყვანა.
აღსანიშნავია, რომ მიხეილ სააკაშვილი სამი ინსტანციის სასამართლოს განაჩენით, დამნაშავედ არის ცნობილი ვალერი გელაშვილის ცემისა და სანდრო გირგვლიანის სისხლის სამართლის საქმეებზე. მას სასჯელის ზომად განსაზღვრული აქვს თავისუფლების აღკვეთა ექვსი წლის ვადით.
ასევე, მიხეილ სააკაშვილი ბრალდებულია ტელეკომპანია „იმედის“ დარბევის, 7 ნოემბრის დარბევის, პატარკაციშვილების ქონების უკანონოდ დაუფლებისა და სახელმწიფო დაცვის სპეციალური სამსახურის კუთვნილი 9 024 367 ლარის პირადი მიზნებისთვის გაფლანგვის ფაქტებზე.
ავტორი: ეკატერინე ზარნაძე
