ფეხბურთელ გიორგი შაქარაშვილის განზრახ მკვლელობაში ბრალდებული ერთ-ერთი არასრულწლოვნის ზ.ხ პროტესტის ნიშნად შიმშილობას იქამდე არ შეწყვეტს, ვიდრე მისი მოთხოვნები არ დაკმაყოფილდება. ინფორმაციას მისი ადვოკატი გიორგი გელხაური ავრცელებს.
მისი განცხადებით, ბრალდებული ითხოვს, რომ სიცრუის დეტექტორის მეშვეობით გამოიკითხოს, ასევე სიცრუის დეტექტორი გაიაროს ახვლედიანმა, ამირხანაშვილმა და საქმეზე წარმოდგენილმა იმ მოწმეებმა, რომლებიც ადვოკატის თქმით, ყველა გამოკითხვის დროს ჩვენებებს ცვლიან.
მისივე თქმით, ბრალდებულმა არასრულწლოვანმა ზ.ხ-მ შიმშილობა სასამართლოს დღევანდელ პროცესზე გამოაცხადა. ასევე შუამდგომლობა დააყენეს იმ პროკურორის აცილების თაობაზე, რომელიც არასრულწლოვანის გამოკითხვას ესწრებოდა და მასზე ფიზიკური და სიტყვიერი ზეწოლა განხორციელდა.
პროკურატურის მიერ წარდგენილ მტკიცებულებებს არ იზიარებს კიდევ ერთი არასრულწლოვანი ბრალდებულის ლ.ც.-ს ადვოკატი არჩილ ბერიანიძე.
ადვოკატის თქმით, მისი დაცვის ქვეშ მყოფი წარდგენილ ბრალდებას არ ეთანხმება.
საქმეზე შემდეგი პროცესი 20 აგვისტოს 14:00 საათზე ჩაინიშნა.
