პარტია „მოქალაქეების“ ლიდერი ალეკო ელისაშვილი ჯარის მიმართ მიხეილ სააკაშვილის მოწოდებას მავნებლობას უწოდებს. მისი თქმით, არის საკითხები, რომლებსაც არანაირი პოლიტიკური ზრახვით არ უნდა შეეხო. ალეკო ელისაშვილის განმარტებით, სწორედ ასეთი წმინდა საკითხია შეიარაღებული ძალები.
„ეს მავნებლობაა. არის საკითხები, რომლებიც წმინდა საკითხებია, რომელსაც არ უნდა შეეხო არანაირი პოლიტიკური ზრახვითა და პოლიტიკური სურვილით. ჩემთვის და ზოგადად, სახელმწიფოსთვის ასეთი წმინდა საკითხია თავდაცვის ძალები და შეიარაღებული ძალები. არასდროს არავინ არ უნდა ცდილობდეს, პოლიტიკური გავლენები მოახდინოს ჯარისკაცებსა და ოფიცრებზე, არავითარ შემთხვევაში არ შეიძლება, კონსტიტუციაშიც წერია, პოლიტიკის მიღმა მყოფი სტრუქტურაა. ზოგადადაც, განცდითაც ეს არის საერთო ეროვნული სიამაყე და პოლიტიკურადაც ეს არის თემა, რომელსაც არ უნდა შეეხო. სააკაშვილს ხომ ასეთი თემები არ აქვს, წმინდა, საამაყო, ოღონდ მან თავისას მიაღწიოს და მზადაა, ყველაფერზე წავიდეს, ეს ამის დასტურია“, – აღნიშნა ალეკო ელისაშვილმა.
მიხეილ სააკაშვილი მორიგ ვიდეომიმართვას ავრცელებს, რომლის ადრესატებიც ქართველი სამხედროები არიან.
