საქართველოში აშშ-ს ელჩი ე.წ. სამხრეთ ოსეთის გუშინდელ განცხადებას ეხმაურება და ამას საზოგადოების შეცდომაში შეყვანის მცდელობას უწოდებს.
„ეს არის კიდევ ერთი სუსტი მცდელობა, რომ საზოგადოება შეცდომაში შეიყვანონ და ძირი გამოუთხარონ ნდობას, რაც ქართველებს აქვთ ლუგარის ცენტრისა და დაავადებათა კონტროლის ცენტრში მომუშავე ქართველების საქმიანობის მიმართ“, – ამბობს დეგნანი.
ცხინვალის საოკუპაციო რეჟიმის განცხადებას ამირან გამყრელიძემაც უპასუხა და განაცხადა, რომ ამ ზღაპარს მისი შვილიშვილებიც არ დაიჯერებენ.
შეგახსენებთ, ცხინვალის დე ფაქტო უშიშროების კომიტეტმა განცხადება გაავრცელა, რომლის მიხედვითაც ე.წ. საზღვარზე დაკავებული ხვიჩა მღებრიშვილი ცხინვალის კონტროლირებად ტერიტორიაზე ღამურების დასაჭერად გადადიოდა, რომელსაც დაავადებათა კონტროლის ეროვნულ ცენტრზე ჰყიდდა.
ხვიჩა მღებრიშვილი საოკუპაციო ძალების წარმომადგენლებმა ე.წ. საზღვრის უკანონო კვეთისთვის 3 ივლისს დააკავეს.
