დაავადებათა კონტროლის ეროვნული ცენტრის ხელმძღვანელის, ამირან გამყრელიძის განმარტებით, ბაზრობებზე მეთვალყურეობა სერიოზულად გამკაცრდება და შესაბამისი ჯარიმებიც დაწესდება. ამის შესახებ მან ჟურნალისტებთან საუბრისას განაცხადა.
მისი თქმით, სიმკაცრის გარეშე შესაძლოა ინფექცია კიდევ უფრო გავრცელდეს.
„სერიოზულად მკაცრდება მეთვალყურეობა ბაზრობებზე. ყველგან დაცული უნდა იყოს შესაბამისი პირობები. შესვლისას თერმოსკრინინგი, ყველა უნდა იყოს პირბადით. მაღაზიაში თუ დახლთან პირბადით უნდა მუშაობდეს ყველა. უნდა დაიცვან სოციალური დისტანცირება და ხშირად უნდა დაიმუშაონ ხელები სანიტაიზერით.
აუცილებელია ეს და ამაზე იქნება სერიოზული მეთვალყურეობა შესაბამისი ჯარიმებით და შესაბამისი აღსრულებითი ღონისძიებებით, რადგან ამ შედარებით მკაცრი ღონისძიებების გარეშე არის რისკი, რომ ინფექცია კიდევ უფრო მეტად გავრცელდეს“,- ამბობს გამყრელიძე.
ცნობისთვის, კორონავირუსით გარდაცვლილი მე-16 პაციენტის ოჯახის წევრები, რომლებსაც კორონავირუსი აქვთ, სხვადასხვა ბაზრობაზე მუშაობდნენ.
