ბეირუთში მომხდარი აფეთქების საქმეზე პორტის ადმინისტრაციის 16 თანამშრომელი დააკავეს. ინფრმაციას ამის შესახებ უცხოური მედია ავრცელებს.
გამოცემის ცნობით, ეს ის პირები არიან, რომლებმაც რემონტი ჩაატარეს იქ, სადაც ასაფეთქებელი ნივთიერება ინახებოდა.
„სამხედრო პროკურატურა აფეთქების გამოძიების საწყის ეტაპს ასრულებს. პორტის ადმინისტრაციის საბჭოდან 18-ზე მეტი ადამიანი დაიკითხა. ეს ის პირებია, რომლებმაც რემონტი ჩაატარეს ანგარში, სადაც ასაფეთქებელი ნივთიერება ინახებოდა. ამ მომენტისთვის გამოძიების ფარგლებში დაკავებულთა რიცხვი 16 ადამიანს შეადგენს“, – განაცხადა უწყების წარმომადგენელმა.
ცნობისთვის, რამდენიმე დღის წინ ძლიერი აფეთქება მოხდა, რამაც 200-მდე ადამიანის სიცოცხლე იმსხვერპლა, ხოლო ათასობით ადამიანი მძიმედ დაშავდა.
ლიბანის პრემიერ-მინისტრის განცხადებით, ბეირუთში აფეთქება 2 750 ტონა ამონიუმის ნიტრატმა გამოიწვია, რომელიც საწყობში ექვსი წლის განმავლობაში უყურადღებოდ იყო მიტოვებული. მისივე თქმით, მომხდარის გამო პასუხისმგებელი პირები მკაცრად დაისჯებიან.
