ბელარუსის ტრანსპორტისა და კომუნიკაციების სამინისტრომ ბელარუსელ დისპეჩერსა და Ryanair-ის პილოტს შორის 23 მაისს გამართული საუბრის ტრანსკრიფტი გამოაქვეყნა.
ინფორმაციას „დოჟდი“ ავრცელებს.
დისპეჩერი: RYR 1TZ, ჩვენ გვაქვს ინფორმაცია სპეცსამსახურებისგან, რომ ბორტზე ბომბია განთავსებული და ის, შესაძლოა, ვილნიუსის თავზე გააქტიურდეს.
პილოტი: გასაგებია.
დისპეჩერი: უსაფრთხოების მიზნით, გირჩევთ მინსკის ეროვნულ აეროპორტში დაეშვათ.
პილოტი: კარგი.. გასაგებია… მოგვეცით ახალი მიმართულება. ბომბი… საიდან მიიღეთ ეს ინფორმაცია?
დისპეჩერი: აეროპორტის უსაფრთხოების სამსახურის წარმომადგენლებმა განაცხადეს, რომ მათ ელექტრონული შეტყობინება მიიღეს.
პილოტი: ვინლიუსის თუ საბერძნეთის აეოროპორტის უსაფრთხოების სამსახურმა?
დისპეჩერი: ელექტრონული შეტყობინება რამდენიმე აეროპორტშია გაგზავნილი.
პილოტი: გასაგებია. მაგრამ.. კიდევ ერთხელ, საიდან მიიღეთ მინსკში გადამისამართების რეკომენდაცია? ვინ გითხრათ? კომპანიამ? გაფრენის პუნქტიდადან თუ დაშვების?
დისპეჩერი: ეს ჩვენი რეკომენდაციებია.
მოსკოვის დროით 12:45 საათზე, პილოტი დისპეჩერს ეკითხება:
„მიპასუხეთ.. არ ისმის კარგად. წითელი, ყვითელი თუ მწვანე?“.
სავარაუდოდ, საუბარი შესაძლო საფრთხის დონის შეფასებას ეხება.
„ამბობენ, რომ წითელია“,- პასუხობს დისპეჩერი.
ამის შემდეგ პილოტი დისპეჩერს კვლავ ეუბნება, რომ ის ფრენას ვილნიუსის მიმართულებით გააგრძელებს.
მოსკოვის დროსით 12:47 წუთზე პილოტი დისპეჩერს თავად უკავშირდება და აცხადებს, რომ ის მინსკში ჯდება. პილოტი ამბობს, რომ ბორტზე 133 ადამიანი იმყოფება და საფრთხის შემცველი ბარგი არ არის.
დისპეჩერისა და პილოტის საუბარში არ არის ნახსენები გამადგურებელი თვითმფრინავი, რომელიც ჰაერში პრეზიდენტ ლუკაშენკოს ბრძანებით გაუშვეს.
დეპარტამენტში აცხადებენ, რომ ბომბის შესახებ ინფორმაცია მინსკის ეროვნულმა აეროპორტმა შემდეგი ელექტრონული მისამართიდან მიიღო – protonmail.com.
მათი თქმით, განცხადების შინაარსი ასეთი იყო.
„ჩვენ, ჰამასის ჯარისკაცები, მოვითხოვთ რომ ისრაელმა ღაზის სექტორში ცეცხლი შეწყვიტოს. მოვითხოვთ, ევროკავშირმა ამ ომში ისრაელის მხარდაჭერაზე უარი თქვას. ცნობილია, რომ Delphi Economic Forum-ის მონაწილეები სახლში რეისი – FR4978-ით ბრუნდებიან. ამ თვითმფრინავში ბომბია განთავსებული. თუ ჩვენს მოთხოვნებს არ შეასრულებთ, ბომბი 23 მაისს ვილნიუსის თავზე აფეთქდება“.
მოძრაობა „ჰამასმა“ მომხდარში მონაწილეობა უარყო.
შეგახსენებთ, რომ Ryanair-ის თვითმფრინავი, რომელიც ათენიდან ვილნიუსში მიფრინავდა და რომელშიც ბელარუსის ხელისუფლებისადმი ოპოზიციურად განწყობილი ჟურნალისტი, რომან პროტასევიჩი იმყოფებოდა, 23 მაისს ავარიულად მინსკში დაეშვა.
ბელარუსის სახელმწიფო მედიის ინფორმაციით, ამის მიზეზი ბორტზე არსებული საფრთხე იყო. თუმცა, თვითმფრინავში ასაფეთქებელი ნივთიერებები არ აღმოჩნდა.
თვითმფრინავის დაფრენისთანავე მინსკში ოპოზიციურად განწყობილი ჟურნალისტი, რომან პროტასევიჩი დააკავეს.
