პარტია „ქართული ოცნება-დემოკრატიული საქართველოს“ თავმჯდომარემ ბიძინა ივანიშვილმა, შესაძლოა, 2020 წლის საპარლამენტო არჩევნებში დეპუტატის მანდატის მოპოვებისთვის იბრძოლოს. ამის შესახებ “პრაიმტაიმნიუსს” ინფორმაცია ექსკლუზიურად “ქართულ ოცნებასთან” დაახლოებულმა ექსპერტმა გია აბაშიძემ მიაწოდა.
“ქართულ ოცნებაში” ამ ინფორმაციას არ გამორიცხავენ და აღნიშნავენ, რომ საზოგადობას ივანიშვილის გადეპუტატება არ უნდა გაუკვირდეს.
„შემიძლია გამოვხატო ჩემი დამოკიდებულება – ივანიშვილის, როგორც „ქართული ოცნების“ ლიდერის, პოლიტიკის წამმართველი ლიდერის, საარჩევნოდ პოლიტიკაში ყოფნა მოულოდნელი არ უნდა იყოს, თუნდაც სიის დონეზე.
იგი გახლავთ პარტიის თავმჯდომარე და პოლიტიკაში აბსოლუტურად ლეგიტიმურად იმყოფება. ის არაფორმალური მმართველობა, რომელზეც წლების მანძილზე უსაფუძვლოდ იყო საუბარი, დასრულებულია“,- განაცხადა კობა ლურსმანაშვილმა “პრაიმტაიმნიუსთან”.
ინფორმაციისთვის, საპარლამენტო არჩევნები 2020 წლის 31 ოქტომბერს გაიმართება. არჩევნების შემდეგ, პარლამენტში 30 მაჟორიტარი და 120 პროპორციულ სიაში შესული დეპუტატი შევა.
ასევე, შეგიძლიათ, ნახოთ: Exclusive: გახარია სიის სათავეში, ივანიშვილი პარლამენტში?- ვინ ჩაიბარებს საკრებულოდან დეპუტატის მანდატს
ავტორი: ეკატერინე ზარნაძე
