გურჯაანის მუნიციპალიტეტის სოფელ ჩუმლაყში ჩატარებული მასობრივი ტესტირების პასუხი ცნობილია. დაავადებათა კონტროლის ცენტრის კახეთის განყოფილების ხელმძღვანელის, ნელი ხიზანიშვილის ინფორმაციით, მასობრივი ტესტირება, სოფელში კორონავირუსის დადასტურებული შემთხვევის შემდეგ გადაწყდა.
„ჩუმლაყში ჩამოსული პირისათვის ვირუსის დადასტურების შემდეგ, გადაწყდა, რომ მასობრივი ტესტირება ჩაგვეტარებინა. რაკი ის ცხოვრობდა სამაცივრე მეურნეობაში და იქ ბევრი ადამიანი იყრის თავს, კონტაქტში მყოფი 106 ადამიანის ბიოლოგიური მასალა ავიღეთ. ლუგარის ლაბორატორიის დასკვნით, ყველა აღმოჩნდა უარყოფითი“,- განაცხადა ხიზანიშვილმა.
ამ ეტაპზე, თვითიზოლაციაში გადაყვანილია ინფიცირებულთან პირდაპირ კონტაქტში მყოფი 20 ადამიანი, რომელთა პირველადი ტესტირების პასუხი უარყოფითია.
კორონავირუსით ინფიცირებული პირი, სომხეთიდან საქართველოში, 29 ივნისს შემოვიდა. მას ვირუსი მხოლოდ მეოთხე ტესტირების შემდეგ დაუდასტურდა. ახალგაზრდა მამაკაცს, თბილისში, ბოჭორიშვილის სახელობის კლინიკაში მკურნალობენ.
ავტორი: ხათუნა გულიაშვილი
