ჩვენ ვებრძვით ქვეყანაში კოვიდსაც და „ქართულ ოცნებასაც”, ორ ვირუსს, რომელიც აზიანებს დღეს ჩვენი მოქალაქეების კეთილდღეობას,- ამის შესახებ „ევროპული საქართველოს“ ლიდერმა, დავით ბაქრაძემ ჟურნალისტებს განუცხადა.

„ჩვენ სრულად დავიცავთ იმ რეკომენდაციებს, რომელიც ექნებათ ექიმებს უსაფრთხოებასთან დაკავშირებით, რადგან ვუფრთხილდებით მოსახლეობის ჯანმრთელობას და სიცოცხლეს. მაგრამ იმის იმედი , რომ ქვეყანაში შეჩერდება პოლიტიკური აქტივობა, იმის იმედი, რომ ხალხი აღარ გამოხატავს საკუთარ პროტესტს და არჩევნებზე ვირუსის დახმარებით გაიმარჯვებს მეორე ვირუსი „ქართული ოცნება”, არ უნდა გვქონდეს. გაგრძელდება კამპანია, გაგრძელდება შეხვედრები და ვირუსს ამოფარებული, მეორე ვირუსი 31 ოქტომბერს ამ ქვეყანას მოსცილდება. ამიტომ ვირუსის და პანდემიის მხარეს ჩვენ არ ვდგევართ, ჩვენ ვებრძვით ქვეყანაში კოვიდსაც და „ქართულ ოცნებასაც”, ორ ვირუსს, რომელიც აზიანებს დღეს ჩვენი მოქალაქეების კეთილდღეობას, ჯანმრთელობას და ნორმალურ ცხოვრებას,“ – განაცხადა დავით ბაქრაძემ.

დღეს „ქართული ოცნების“ ერთ-ერთი ლიდერმა, მამუკა მდინარაძემ ბრიფინგი გამართა და ოპოზიციას წინასაარჩევნო შეხვედრებზე კორონავირუსთან დაკავშირებული რეგულაციების დაცვისკენ მოუწოდა.

მანამდე კი, ამირან გამყრელიძემ პოლიტიკურ პარტიებს მოუწოდა, რომ ამომრჩეველთან შეხვედრები ღია სივრცეში ჩაატარონ.