ხელისუფლების დაკვეთით ყველა ინსტიტუტი კონკრეტული უდანაშაულო ადამიანის წინააღმდეგ მუშაობს, – ასე ეხმაურება „ევროპული საქართველოს“ ერთ-ერთი ლიდერი, დავით ბაქრაძე გიორგი რურუასთვის გამოტანილ განაჩენს.
„ხელისუფლების დაკვეთით პოლიციაც, პროკურატურაც და სასამართლოც ჩართულია უკანონო დაკვეთის აღსრულებაში და უდანაშაულო ადამიანის დაჭერაში. ეს არის ის სისტემა, რომელიც ყოველთვის იყო ამ ქვეყნის პრობლემა, მაგრამ განსაკუთრებით შეისისხლხორცა ბოლო წლებში „ქართულმა ოცნებამ“. დღეს ეს სისტემა მუშაობს სწორედ ხელისუფლებისა და „ქართული ოცნების“ სამსახურში.
ჩვენი ამოცანა უნდა იყოს, რომ ეს სისტემა ერთხელ და სამუდამოდ მოვაშოროთ ქვეყანას, წარსულს ჩავაბაროთ ის მოცემულობა, როცა ხელისუფლების დაკვეთით ყველა ინსტიტუტი მუშაობს კონკრეტული უდანაშაულო ადამიანის წინააღმდეგ. ჩვენი ამოცანა იქნება ოქტომბრის არჩევნების შემდეგ არა მხოლოდ გიორგი რურუას გათავისუფლება, არამედ იმ სისტემის დანგრევა, რომელიც ხელისუფლებას ეხმარება, რომ უდანაშაულო ადამიანები გაუშვას ციხეში,“ – განაცხადა დავით ბაქრაძემ.
