ჭყონდიდის ეპარქიის მიტროპოლიტი სტეფანე პრესკონფერენციაზე დედა სოსანაზე საუბრობს და ამბობს, რომ მას დადგმული სცენებით თამაში უყვარს.
როგორც მეუფე ამბობს, მან დედა სოსანას ლასურიაშის მონასტერში წასვლაც შესთავაზა.
„სამჯერ მოვიდა იქ. პირველად რომ მოვიდა და არ შეუშვეს, ჩვეულებრივად შეეძლო, წასულიყო და დაეძინა, პრობლემა არ ჰქონდა, მაგრამ ჩაიფიქრა შემდეგი განვითარება. მოვიდა მეორედ, დადგეს სცენარი, როგორი იქნებოდა. მესამედ რომ მოვიდა, დატოვეს წვიმაში ზუსტად 10 წუთით, შემდეგ მოვიდნენ ტელევიზიები, კიდევ სხვები და იღებდნენ საწყალ მონაზვნებს, რომლებიც გარეთ დარჩნენ წვიმაში და რა ქნან, არ იციან, როგორ გაათიონ ღამე. ეს არის კიდევ ერთი ტყუილი, აქედან გამომდინარე გვიწევდა ამაზე ჩვენი პოზიციის დაფიქსირება. ჩვენი კადრებიც გვაქვს, სადაც ჩანს, რომ ეს სპექტაკლი განვითარდა.
დედა სოსანა შემდეგ ერთხელ კიდევ მოვიდა, ჩვენ გვითხრეს, რომ დედა სოსანაა მოსული, მე სასწრაფოდ ვთხოვე, გასულიყვნენ და დალაპარაკებოდნენ, ოღონდ, ვეღარ მოასწრეს, ვიდრე ჩემგან წარგზავნილები მონასტრამდე მივიდნენ, ის უკვე წავიდა. უბრალოდ კადრები აიღეს, როგორ აბრახუნებს კარზე – გააღეთ, თქვე დალოცვილებო, ეს იყო და წავიდა, შემდეგ შექმნეს კინო, ამ კინოს უყურებს ხალხი და ჰგონიათ, რომ საწყალი მონაზონი დაიჩაგრა, სად შეყოს თავი.
მე შევუთვალე, რომ თუ უნდა, კამერების გარეშე მოვიდეს, ჩვეულებრივად, ყველაფერზე ნორმალურად დავილაპარაკებთ, თუ უნდა, კამერებით მოვიდეს და მაშინ კამერებით ვილაპარაკოთ ისე როგორც კამერებით ლაპარაკობენ, მაგრამ მონაზონსა და ეპისკოპოსს შორის უკამეროდ ლაპარაკი გაცილებით მეტი სარგებლის მომტანია სულისთვის, ამიტომ, მე შევთავზე, არ გამოიყენა, ეს შოუები უფრო მოეწონა“, – განაცხადა მეუფე სტეფანემ.
