სახალხო დამცველი ნინო ლომჯარია და ომბუდსმენთან არსებული ექიმთა ჯგუფი გორის სამხედრო ჰოსპიტალში, საქართველოს მესამე პრეზიდენტის, მიხეილ სააკაშვილის მოსანახულებლად შევიდნენ.
საავადმყოფოში შესვლამდე ნინო ლომჯარიამ განაცხადა, რომ დღეს ნევროლოგთან ერთად მიხეილ სააკაშვილთან შევა ფსიქიატრიც.
„ბოლო ვიზიტის შემდგომ ჩვენ გავაკეთეთ რეკომენდაციები და ერთ-ერთი რეკომენდაცია იყო, რომ პაციენტის მართვასა და მკურნალობაში სასურველი იყო, მონაწილეობა მიეღო ფსიქიატრს და ფსიქოლოგს, რადგან გარკვეულ სტრესზე იყო საუბარი. ასევე, გაჟღერდა ალტერნატიული ექსპერტების, ადვოკატების მხრიდან და პირადი ექიმის მხრიდან, რომ გარკვეული პრობლემებია ამ მიმართულებით, ამიტომ ჩავთვალეთ საჭიროდ, რომ დასამატებელია ამ მიმართულებით შესაბამისი ექსპერტიზა. დღეს ნევროლოგთან ერთად იმუშავებს ექიმი ფსიქიატრიც, რომ შევაფასოთ ის წუხილები, რაც გამოითქვა მათ შორის დოზირებასთან დაკავშირებით. მათ შორის, შესრულდა თუ არა ის რეკომენდაციები, რაც ჩვენც გავეცით ჩასატარებელ ფსიქოსოციალურ თერაპიასთან დაკავშირებით. ვფიქრობ, რომ დღეს უფრო სრულყოფილად შევაფასებთ სურათს“, – განაცხადა ლომჯარიამ.
