„ქართული ოცნების“ თავმჯდომარე, ირკალი კობახიძე დმანისში განვითარებულ მოვლენებს ეხმაურება.
როგორც ირაკლი კობახიძე ამბობს, პოლიციამ ეფექტურად იმოქმედა, რის საფუძველზეც ვითარება განიმუხტა.
„გუშინვე იყო რამდენიმე ადამიანი დაკავებული. რაც შეეხება პოლიციის რეაგირებას, ეს რეაგირება სათანადო და ადეკვატური იყო. ამის შედეგები კი ყველამ იხილა. ის, რომ ამ პრობლემის დეესკალაცია ერთ დღეში მოხერხდა, იმაზე მეტყველებს, რომ სამართალდამცავმა სტრუქტურებმა სათანადოდ იმოქმედეს“, – აცხადებს ირაკლი კობახიძე.
ცნობისთვის, ჩხუბი დმანისში 9 აპრილის ქუჩაზე, ადგილობრივ აზერბაიჯანულ თემსა და სვანეთიდან ჩასახლებულ ეკომიგრანტებს შორის დაიწყო. დაპირისპირება რამდენჯერმე გამწვავდა და ხელჩართულ ჩხუბში გადაიზარდა.
ერთ-ერთი მაღაზიის სათვალთვალო კამერამ დააფიქსირა ჯოხებითა და ბეისბოლის ბიტებით შეიარაღებული ახალგაზრდების ჯგუფი. რამდენიმე მოქალაქეს სხეულის მძიმე დაზიანებები აქვს – დაზიანებულია მაღაზია და ავტომობილი.
დაპირისპირებული მხარეები გუშინ შერიგდნენ და ერთმანეთს ხელი ჩამოართვეს.
