ბატონი ელისაშვილი თვითლუსტრაციას აღარ საჭიროებს, შემდეგში შეუძლია ბატონ კობახიძესთან ერთად ჩაატაროს ბრიფინგი, – ამის შესახებ „ევროპული საქართველოს“ ერთ-ერთმა ლიდერმა გიგა ბოკერიამ განაცხადა.
ბოკერიამ ელისაშვილის ბრალდებებს უპასუხა და განაცხადა, რომ ოპოზიციას რევოლუცია არ უნდა და სწორედ ამისთვის საჭიროა ვადამდელი არჩევნები.
„რაც შეეხება იმას, რისი შეცვლა შეუძლია ოპოზიციას და რისი არა, რომ შესულიყო პარლამენტში – საკითხის ასე დასმა ფუნდამენტურად მცდარია. მანდატების გამოყენებაზე არ არის ტესტი აქ, ტესტია ის, შეუძლია თუ არა ძალაუფლება დაიტოვოს ადამიანმა, თუ უმრავლესობას მისთვის მხარი არ დაუჭერია. პასუხი არის არა, არ შეიძლება, რადგან ეს გვაყენებს იმ ქვეყნების რიცხვში და იმ გზაზე, რასაც მოჰყვება უზარმაზარი ზარალი, მსხვერპლი მორალური, ფაქტობრივი, ყველანაირი.
მაშინ ხდება ან შეცვლა სხვანაირად, რევოლუციებით, ან ხდება შეგუება ავტორიტარიზმთან. მეორე ხომ კატასტროფაა და არ უნდა დავუშვათ და არც რევოლუცია გვინდა, ამიტომაა საჭირო ახალი, ნორმალური, ვადამდელი არჩევნები,”- განაცხადა გიგა ბოკერიამ.
შეგახსენებთ, რომ ელისაშვილმა ოპოზიციის ნაწილი მოლაპარაკებების ჩაშლის მცდელობაში დაადანაშაულა.
მან ასევე განაცხადა, რომ პოლიტიკოსების ნაწილი პოლიტიკური კრიზისის გადაჭრის რევოლუციურ სცენარსაც განიხილავს.
