„ვინც არ მოაწერს შეთანხმებას, ესე იგი მას სძულს ქვეყანა, კრიზისი უფრო გაღრმავდება“,- ამის შესახებ პარტია „მოქალაქეების“ ლიდერმა, ალეკო ელისაშვილმა კრისტიან დანიელსონთან შეხვედრის დაწყებამდე განაცხადა.
როგორც ალეკო ელისაშვილი ამბობს, დღეს გამოჩნდება ვის უყვარს რეალურად ქვეყანა და ვის არა.
„ეს კრიზისი უკვე დაემსგავსა იწილო-ბიწილოს და ბასტი-ბუბუს, სადაც გაჯიუტებული ბავშვები რაღაცას არ თმობენ. ამასობაში გაღატაკდა ქვეყანა. ვინმეს ტუ უნდა, რომ ხალხზე ვიფიქროთ დღეს არის შანსი, რომელიც არავინ ხელიდან არ უნდა გაუსვას. დღეს გამოჩნდება ვის უყვარს ქვეყანა და ვის არა.
უხერხულია უბრალოდ ქვეყნის წინაშე და ხალხის წინაშე. ხალხს აქვს რეალური პრობლემები და ნახევარი წელია მიდის ეს გაუთავებელი რაღაც.
გუშინ ძალიან მკაფიოდ თქვა ბატონმა დანიელსონმა, რასაც ვეთანხმები, რომ მთავარი არის მართლმსაჯულების და საარჩევნო სისტემის რეფორმა. ამას ჩვენც გავიძახით და ხალხიც ამას ამბობს“,- განაცხადა ალეკო ელისაშვილმა.
ცნობისთვის, დღეს კრისტიან დანიელსონის შეუამავლობით ოპოზიციასა და ხელისუფლებას შორის მოლაპარაკებები გაიმართება. შეხვედრა ცოტა ხანში დაიწყება.
