ISFED-მა ”საქართველოს პატრიოტთა ალიანსის” სასარგებლოდ მოქმედი მასშტაბური Facebook ქსელი გამოავლინა.
პარტიასთან არის დაკავშირებული 10 კოორდინირებული მადისკრედიტირებელი Facebook გვერდი, რომელთაც ანტიდასავლური და პრორუსული განწყობებით ცნობილი აქტივისტი – ბაკურ სვანიძე მართავს.
აღნიშნული გვერდების პოსტებს კი ჯგუფებში არანაკლებ 12 რეალური და არაავთენტური ანგარიში ერთმანეთის მონაცვლეობით ავრცელებს.
კონკრეტულად, ქსელში შედის ბაკურ სვანიძესთან დაკავშირებული და დანარჩენი ოპოზიციისა და რიგ შემთხვევაში ხელისუფლების დისკრედიტაციის მიზნით მოქმედი 11 Facebook გვერდი (მათ შორის, 1 გაუქმებული) და 12 პროფილი, რომლებიც ამ გვერდებიდან პოსტებს 13 სხვადასხვა “ფეისბუქ” ჯგუფში ორგანიზებულად და სავარაუდოდ კონკრეტული გრაფიკის მიხედვით აზიარებენ.
ბაკურ სვანიძის მიერ მართული დისკრედიტაციული გვერდების პოსტების ინტერაქცია, შექმნის დღიდან 2020 წლის 10 აგვისტომდე, 600 ათასამდე აღწევს, ხოლო ვიდეოების ნახვების რაოდენობა 11 მილიონს აჭარბებს – ნათქვამია კვლევაში.
